ШШГЕГ-ын хорих 461 дүгээр ангийн “Старикс” маркийн авто машин жолоодож явсан  хүмүүжигч Г  нь явган зорчигчийг дайрч амь насыг нь хохироосон ноцтой хэрэг гарлаа.Тухайн үед хэргийн газраас зугтаад өөрөө буцаж ирж хэргээ хүлээсэн талаар Замын цагдаагийн эх сурвалж онцоллоо.

Тодруулбал, БГД-ийн нутаг  “ТЭЦ-4”- ийн зам "Хүн од"  хиамны үйлдвэрийн урд замд  H.Ctarex  маркийн  авто машины жолооч, хоригдол  Г нь явган зорчигч 40-45 орчин насны эрэгтэй хүнийг дайрч амь насыг нь хохироосон байна.

Угтаа бол хоригдож байгаа хүнээр машин тэрэг тэр дундаа улсын өмч бариулахыг тус хорих ангийн удирдлагууд, дарга нар нь мэддэг бололтой. Хоригдлын хувьд хий гэснийг нь хийх ёстой учир машин барьсан нь дамжиггүй.  Юутай ч хэргийг ГХТГ-ын ЗТОХШХ-т шалгаж байна.

Ер нь хорих ангиудад хоригдол амиа алдахаас эхлээд янз бүрийн хэрэг зөрчлүүд гарч сонсогддог. Тухайлбал, өнгөрсөн онд Газрын тосны газрын дарга асан Д.Амарсайхан хорих 461-р ангийн уулзалтын өрөөнд амьсгал хураасан. Учир нь түүнийг өвчтэй байхад хорисоор байсан нь амиа алдахад хүргэсэн гэж ар гэрийнхэн нь үзэж байгаа. Энэ мэт хоригдол амиа алдсан мэдээллийг УЕПГ-аас ч өгч байсан.

Мөр хорих ангийн камерт өөрийгөө шатааж байсан тохиолол ч бий. Энэ мэт хоригдол амиа егүүтгэх, амиа алдах, оргож зугтах асуудлын хажуугаар хоригдол машин барьж яваад хүн дайрч хөнөөсөн нь багагүй асуудал үүсгэх нь.

Хорих анги болон баривчлах байрнуудад 2014 онд гарсан гэмт хэргүүдийг дор сийрүүлье.

Нийслэлийн прокурорын газрын ял эдлүүлэх ажиллагаанд тавих хяналт хариуцсан хэлтсээс нийслэл, дүүргийн прокурорын газруудын хяналтын харьяа хорих анги болон баривчлах байрнуудад 2014 онд гарсан гэмт хэргийн талаархи судалгааг хийсэн байна.

Судалгаагаар дүүргийн прокурорын газруудын хяналтын харъяа хорих ангиудад нийтдээ 23 гэмт хэрэг гарсан ба дүүрэг тус бүрээр нь авч үзвэл: дүүргийн 1 дүгээр прокурорын газрын харьяа хорих ангиудад  5 гэмт хэрэг, дүүргийн 2 дугаар прокурорын газрын харьяа хорих ангиудад 7 гэмт хэрэг, дүүргийн 3 дугаар прокурорын газрын харьяа хорих ангиудад 6 гэмт хэрэг, дүүргийн 4 дүгээр прокурорын газрын харьяа хорих ангид 5 гэмт хэрэг гарчээ.

Гэмт хэрэг гарсан хорих ангиудыг анги тус бүрээр нь авч үзвэл: хорих 407 дугаар ангид 2, хорих 409 дүгээр ангид 1, хорих 421 дүгээр ангид 2,  цагдан хорих 461 дүгээр ангид 4, хорих 429 дүгээр ангид 1, хорих 411 дүгээр ангид 2, хорих 417 дугаар ангид 2, хорих 427 дугаар ангид 4, хорих 415 дугаар ангид 5 гэмт хэрэг тус тус гарсан байна.

 Дээрхи гарсан нийт гэмт хэргүүдийг ангилж үзвэл хүнд гэмт хэрэг 5, хүндэвтэр гэмт хэрэг 11, хөнгөн гэмт хэрэг 7 гарсан байх ба хэргийн  шийдвэрлэлтийн байдлыг судалж үзэхэд 7 хэргийг хэрэгсэхгүй болгож, 9 хэргийг шүүхээр шийдвэрлэж, 6 хэрэг нь хэрэг бүртгэлт, мөрдөн байцаалтын шатанд шалгагдаж, 1 хэрэг шүүхийн шатанд шийдвэрлэгдээгүй байна.

 Хорих ангиудад гарсан дээрхи гэмт хэргүүд нь ялтны харуул хамгаалалтанд тавих хяналт сул, шийдвэр гүйцэтгэх байгууллагын алба хаагчдын ажлын хариуцлага хангалтгүй, ялтны дунд зохиох сургалт, хүмүүжил, нийгэмшүүлэх ажил шаардлагын хэмжээнд хүрэхгүй байгаа мөн ялтнуудын дунд гэмт хэрэг, зөрчлөөс урьдчилан сэргийлэх талаар хорих ангийн захиргаанаас зохион байгуулж буй ажил хангалтгүй байгаатай шууд холбоотой гэж үзэхээр байна.