Жил бүрийн тавдугаар сарын хоёр дахь долоо хоногийг “ТАТВАР ТӨЛӨГЧДИЙН ӨДРҮҮД” болгон зохион байгуулдаг. Энэ жил тус арга хэмжээг орон даяар “ХЭРЭГЦЭЭНД ҮНДЭСЛЭСЭН ЗӨВЛӨГЧ ТАТВАРЫН АЛБА” уриан дор  эхлүүлсэн бөгөөд өнөөдөр /2026.05.04/ шилдэг татвар төлөгчдөд шагнал гардуулах ёслолыг зохион байгууллаа.

Арга хэмжээг нээн Сангийн сайд З.Мэндсайхан үг хэлсэн бөгөөд тус мэндчилгээг бүрэн эхээр нь хүргэж байна.

Эрхэм хүндэт татвар төлөгчид өө, Эрхэм хүндэт зочид, төлөөлөгчид өө,

Юуны өмнө Монгол Улсынхаа нийгэм, эдийн засгийн хөгжилд үнэтэй хувь нэмэр оруулж, шударгаар татвараа төлж, улс орныхоо ирээдүйд хөрөнгө оруулж буй Та бүхэндээ чин сэтгэлийн талархал илэрхийлье.

Татвар төлөгч Та бүхэн улсын төсвийг бүрдүүлэгч төдийгүй Монгол Улсын хөгжлийн тулгуур, бодит бүтээгчид юм. Та бүхний хөдөлмөр, хариуцлага, итгэл дээр манай улсын боловсрол, эрүүл мэнд, дэд бүтэц, нийгмийн үйлчилгээ бүхэлдээ тогтож байна.

Улсын төсөв гэдэг нь зөвхөн тоо биш, энэ бол ард иргэдийн итгэл, улс орны ирээдүйд оруулж буй хөрөнгө оруулалт. 2025 онд нийт 17.6 их наяд төгрөгийг улс, орон нутгийн төсөвт татварын орлогоор төвлөрүүлэн,   2026 онд 20.0 их наяд төгрөгийг улс, орон нутгийн төсөвт төвлөрүүлэхээр байна.

Өнөөдөр дэлхий дахинд нийгэм, эдийн засгийн огцом өөрчлөлтүүд өрнөж, геополитикийн нөхцөл байдал хурцдаж, дайны нөлөөлөл дэлхийн эдийн засагт тодорхой бус байдал бий болгож буй ээдрээтэй цаг үед Монгол Улсын эдийн засгийн өсөлтийг тогтвортой хангах, төсвийн орлогын баазыг бэхжүүлэх, бизнес эрхлэгчдийг татварын бодлогоор дэмжих, мөн хурдацтай өөрчлөгдөж буй нийгмийн харилцаанд нийцүүлэн татварын бодлогыг шинэчлэх шаардлага бидний өмнө тулгараад байна.

Иймээс Монгол Улсын Засгийн газар, Сангийн яамны зүгээс бид нэг зарчим баримталж байна. Үүнд:

• Төсвийн сахилга батыг чанд мөрдөх;
• Татварын тогтолцооны шинэчлэлийг үе шаттай хэрэгжүүлэх;
• Өрийн удирдлагыг хариуцлагатай, ил тод байлгах;
• Төсвийн төлөвлөлт, зарцуулалтыг олон нийтэд нээлттэй, ойлгомжтой                                         

тайлагнах зэргээр төр болон татвар төлөгчдийн харилцан итгэлцлийг бэхжүүлэхэд онцгой анхаарч ажиллана.

Улсын төсвийн хөрөнгө оруулалтаар 2026 онд 738 төсөл арга хэмжээнд  3.2 их наяд төгрөгийн санхүүжилтийг хийхээр баталсан. Засгийн газраас хэрэгжүүлж буй төсөл хөтөлбөрийг бүрэн хэрэгжүүлэхийг зорин ажиллаж байна.

Иргэн, аж ахуйн нэгжийн татварын ачааллыг бууруулах татварын хуулийн нэмэлт, өөрчлөлтийг УИХ-д өргөн мэдүүлнэ. Энэхүү хуулийн төсөл нь бизнес эрхлэгчдэд үйл ажиллагаагаа өргөжүүлэх нөхцөлийг бүрдүүлж, татварын ачааллыг бууруулах эдийн засгийг тэлэх бодлогын хүрээнд хийгдэж буй шийдвэрүүдийн нэг юм.

Аж ахуйн нэгжийн хувьд бид татварын шатлалыг зөөлрүүлж 25 хувийн татвар ногдуулах босгыг 6 тэрбум төгрөгөөс 10 тэрбум төгрөг болгон нэмэгдүүлж, 6-10 тэрбум төгрөгийн орлогод 15 хувийн татвар ногдуулах зохицуулалтыг нэвтрүүлнэ. Мөн 90 хувийн татварын хөнгөлөлт эдлэх борлуулалтын орлогын босгыг 2.5 тэрбум төгрөг болгон өсгөж, илүү олон бизнесийг дэмжинэ.

Нэмэгдсэн өртгийн албан татварын хүрээнд НӨАТ суутган төлөгчийн босгыг 400 сая төгрөг болгож, импортын бараанд ногдуулсан НӨАТ төлөх хугацааг хоёр сар хүртэлх хугацаагаар хойшлуулах боломжийг бүрдүүлнэ.

Хувь хүний орлогын   албан татварын хуульд сарын 792 мянган төгрөг хүртэлх орлогод ногдох татварыг 100 хувь буцаан олгож, бодит орлогыг хамгаална. Мөн 1 тэрбум төгрөг хүртэлх үйл ажиллагааны орлогод 1 хувийн татвар ногдуулах хялбаршуулсан горимыг хэрэгжүүлнэ. Түүнчлэн иргэд өмчилсөн орон сууцаа борлуулсан тохиолдолд үл хөдлөх хөрөнгө борлуулсны албан татвараас чөлөөлж, амьдрах орчноо сайжруулах боломжийг татварын бодлогоор дэмжинэ.

Бид зөвхөн татварын ачааллыг бууруулаад зогсохгүй, татварын орчныг илүү шударга, уян хатан болгоно. Татварын ерөнхий хуульд тайланг засварлах хугацааг 24 сар болгон сунгаж, бизнес, иргэдэд алдаагаа засах боломж олгох болно.

Монгол Улсынхаа хөгжилд бодит хувь нэмэр оруулж буй нийт татвар төлөгч та бүхэндээ дахин талархал илэрхийлье.

Бид хамтдаа илүү тогтвортой, илүү хариуцлагатай, илүү хүртээмжтэй эдийн засгийг бүтээж чадна гэдэгт итгэлтэй байна.