Солонгосын нэрт жүжигчин Сон Хе Кё-ийн сонин, содон зургуудаар фэйслүүк булан үргэлжилж байна. Түүнийг тус улсын хамгийн царайлаг эмэгтэй жүжигчин гэдэг. Сон Хе Кё сүүлийн үед жүжигчний өндөр ур чадвар шаардсан хэд, хэдэн кинонд тоглож Азийн кино найруулагчдад үнэлэгдээд байна.
Бяцхан эрдэмтэн: Солонгосын хамгийн эрэлттэй, нэр хүнд нь өндөрт гарсан жүжигчин бол Сон Хе Кё юм. Тэрбээр 1981 оны 11-р сарын 22-нд Дэгү хотод төржээ. Харин энэ зургийг 4 настайдаа авахуулжээ. Сон Хе Кё нь “Зүрхэнд шингэсэн намар”, “Бүгдийг нь”, “Миний байшин”,”Салхи үлээсэн тэр нэгэн өвөл” олон ангит кинонуудын гол дүрд тоглож Монголчуудын танил болсон билээ.
Өвчинтэй тэмцэж олж авсан амьдрал. Сон Хе Кё өвчтэй төрсөн учраас амьд үлдэхгүй гэж эмч нар нь хэлж байжээ. Гэвч азаар тэрбээр эдгэрсэн юм. Тиймээс эцэг, эх нь охиныхоо төрсөн өдрийг эдгэрсэн өдрөөр нь тэмдэглэдэг болсон байна. Тэр нь 1982 оны хоёрдугаар сарын 26. Албан ёсны бүх бичиг баримтад нь энэ он, сар, өдөр байдаг аж.
Усан спорт ба уран гулгуур. Эцэг, эхийнх нь салалт түүнийг Ганнам дүүрэгт ээжтэйгээ амьдрахад хүргэжээ. Тэрбээр бага сургуульд байхаасаа уран гулгалтаар хичээллэж эхэлжээ. Мөн усан спортод ч сонирхолтой байв. Гэвч энэхүү спортоо наймдугаар ангид байхдаа орхисон гэдэг.
Багш нарын тодорхойлолт. Түүнийг дунд сургуулийн багш нар нь “Хөгжилтэй, хүүхдүүдтэй эвсэг харьцдаг, цовоо сэргэлэн зантай” гэж тодорхойлсон байдаг.
Амжилтын гараа. Сон Хе Кё 14 насандаа урлагт гялалзаж эхэлжээ. Тодруулбал, 1996 онд загварын тэмцээнд оролцон түрүүлж, дунд сургуулийн хүүхдийн дүрэмт хувцасны модель болж сургуульдаа төдийгүй Солонгост бага зэрэг танигдсан байна.
Анхны кино. Монголчуудын сайн мэдэх 66 ангит “Анхны хайр” кинонд тэрбээр жижиг дүр бүтээсэн нь хамгийн анхны уран бүтээл юм. Тухайн үеийн Солонгосын охидын стиль ч ийм байж.
Боловсрол. Сон Хе Кё 2004 онд “Миний байшин” киногоороо ихээхэн амжилт олж, кино шүүмжлэгчид, үзэгчдээс өндөр үнэлгээ авсний дараа уран бүтээлээсээ дөрвөн жил завсарлаж Сан Франциско хотноо англи хэлний сургуульд сурчээ. Англи хэл сурснаар Америкийн кино ертөнцөд хөл тавьж чадсан юм.
Эргэн ирэлт. 2008 онд эргэн ирж, жүжигчин Хён Бинтай хамтран хайрын тухай кинонд тоглож байсан тэрээр "The Grandmaster" киноны туслах дүр бүтээж, Хятадын зах зээлд гарсан юм. Мөн Японы олон ангит кинонд эсрэг дүр бүтээсэн гэдэг.
Алдаршив. 2011 онд Солонгосын хамгийн хөөрхөн бүсгүйгээр шалгарч, Алтанта, Нью-Йорк, Бонус Айрес, Парис зэрэг дэлхийн томоохон хотуудын зар сурталчилгааны нүүр царай болжээ. Мөн Солонгосын алдартай брэндүүдийг сурталчилдаг юм. Солонгосын эмэгтэй жүжигчдээс анх удаа “Effigies” агентлагийн нүүр царайгаар тодорч Европчуудын дунд мөн нилээд алдаршжээ.
Цуутай хосууд. 2003 онд “Бүгдийг нь” кинонд хамтран тоглосон жүжигчн Ли Бен Хунтай болзож байгаа талаар шуугиан тархсан ч 2004 онд салсанаар шар хэвлэлүүдийн баатар болж байсан юм. Тэднийг их нялуун хосууд байсныг хэвлэлийн папарациуд илчилнэ. Мөн 2009 онд хамтран кинонд тоглосон царайлаг жүжигчин Хён Бинтэй хайр сэтгэлийн холбоотой болсон нь олон нийтэд илэрч байв. Гэвч хосуудыг ямар харилцаатай болохыг хэвлэлээр бичиж байснаас биш өөрсдөө нэг ч удаа албан ёсоор мэдэгдэж байгаагүй ажээ. Гэвч 2011 онд Хён Бин цэргийн сургуульд элссэний дараа хосууд салсан нь тодорхой болсон юм.
Өөрийн хэлсэн үг. Тэрээр байнга олон нийтийн анхааралд өртөж байдаг бөгөөд үүнийгээ "Миний насны бүсгүйчүүдэд байх зүйл" гэж хэлдэг байна. Энэ жил 34 настай тэрбээр цаг үргэлж ганцаараа амьдрахыг хүсэхгүй байгаагаа нуудаггүй. Түүнийг үеийн залуус төдийгүй нас дүү хөвгүүд ч эргүүлдэг гэнэ. Саяхан “Супер Жуниор” хамтлагийн залуу дуучин Сон Хе Кёд хайраа илчилжээ.
Шилдэг. 2007, 2011 онд шилдэг эмэгтэй жүжигчин, 2013 онд Солонгосын хамгийн шилэг 10 одын нэгээр шалгарсан мөч.
Холливүүд. 2014 оны Оксарын шагналд хоёр Хятад кино нэр дэвшсэний нэг нь Сон Хё Кёгийн тоглосон “Grandmaster” кино байв. Уг кинонд хүчирхэг, ухаалаг эмэгтэйн дүрийг бүтээжээ.
Инээдмийн жүжгийн жүжигчин. Олон ангит киноноос гадна хошин шогийн жүжгүүдээрээ алдаршсан гэдгийг хүмүүс тэр бүр мэддэггүй.
Сон Хе Кё бусад алдатнуудын адилаар хүүхдийг ивээх сан болон олон улсын байгууллагад хандив өгдөг гэнэ.
24tsag.mn
Сэтгэгдэл (31)