Газрын маргаан, зөвшөөрөлгүй үйл ажиллагаа манай улсад хэрээс хэтэрсэн гэхэд болно. Иргэний, захиргааны шүүх дээр энэ төрлийн гомдол, саналууд ихээр ирдэгийг ч албаныхан онцолдог.

Зөвшөөрөлгүй, чанарын шаардлага хангаагүй газруудаас зөрчил илэрч, хүн хохирох явдал ч цөөнгүй гардаг. Тэгвэл олон арван зөврөөшөлгүй бас хяналтгүйгээр үйл ажиллагаа явуулдаг газраас энэ удаад “Хандгайт”-ын цанын баазын талаар сийрүүье.

“Хандгайт”-ын хувьд өмнө нь Чингэлтэй дүүргийн Биеийн тамир спортын хорооны мэдэлд байсан гэлцдэг. Ардаа харж хандах эзэнтэй байсан энэ цанын бааз хувьчлагдсанаасаа хойш цанын бааз гэх утгаа алдсан ч Хандгайтын цанын бааз гэж мэдэх бүх хүмүүс өдийг хүртэл зорьсоор байгаа.
 Үүнийг ч ашиг хонжоо хайсан хүмүүс овжноор ашиглаж цана, чарга, тэр ч байтугай түрээсийн гэрээ амандаа багтсан үнээр түрээсэлж байдаг. Мөн тус цанын баазаар үйлчлүүлж цана,чаргаар гулгаж байгаад бэртэл авсан хүний тоо ч жил ирэх тусам нэмэгдсээр байгааг энд онцлох нь зүйн хэрэг биз.

 2006 онд л гэхэд 96 хүн, 2007 онд 75 хүн Хандгайтад чаргаар гулгаж байгаад бэртсэн бол 2008 оны өвөл 232 хүн ямар нэгэн байдлаар бэртсэн байгаа юм. Эдгээр бэртсэн хүний 50 орчим хувь нь бага насны хүүхэд байдаг. Гэхдээ дээрх тоо зөвхөн Гэмтэл согог судлалын үндэсний төвийн бүртгэлд бүртгэгдсэн нь. Тус эмнэлэгт очиж эмчлүүлээгүй хүнд хөнгөн гэмтсэн хэчнээн хүн байгааг нарийн хэлж чадахгүй.

Ийнхүү осол эндэгдэл ихээр гардаг Хандгайтын цанын баазыг Сүхбаатар дүүргийн Мэргэжлийн хяналтын газраас хэдэн жилийн өмнө шалгалт хийж үйл ажиллагааг нь зогсоосон ч тэд үйл ажиллагааг удалгүй үргэлжлүүлсэн.
Өөрөөр хэлбэл, шалгалтаар цанын баазад байх ёстой  явган хүний зам болон гулгах зурвас аль аль нь байхгүй, мөн бэртэж гэмтсэн тохиолдолд анхан шатны эмнэлгийн тусламж үзүүлэх мэргэжлийн эмч сувилагч ч байгаагүй байсаар батал тэд зөрчлөө засахгүй үйл ажиллагаагаа үргэлжлүүлсэн. Харамсалтай нь энэ бүхний эцэст 2015 он гараад хэд ч хоноогүй байхад “Хадгайт”-д хүний амь эрсэдсэн.  Тодруулбал, нэгдүгээр сарын 2-нд 15-хан настай хүүхэд 60 гаруй настай хүнийг чаргаар мөргөж аминд нь хүрсэн.

Энэ нь тус газрын үйл ажиллагаа ямар их доголдолтой, иргэдийн аюулгүй байдал хэрхэн зөрчигдөж буйг олон нийтэд тод томруун харуулсан ноцтой хэрэг байлаа.

Хаа хаанаа сургамж, сэрэмжлүүлэг болсон уг хэргээс хойш “Хандгайт”-ын үйл ажиллагааг зогсоох албан шаардлагыг холбогдох байгууллагууд хүргэсэн.

Тэгвэл тэдний шаардлагыг хэрэгжүүлж байгаа эсэхийг шалгахаар “Хандгайт”-ыг зориход уг газар үйл ажиллагаагаа зогсоож, хүн хүлээж авахгүй байгаагаа хэллээ.

Юутай ч тэд удаа дараа сануулга авч хэрэгжүүлдэггүй байсан хэдий ч хүн амиа алдсан явдлаас хойш ийн үйл ажиллагаагаа зогсоожээ.

Дашрамд хэлэхэд, хүүхэд санамсар болгоомжгүйгээс чаргаар хүн дайрч хөнөөсөн гэх хэрэг Эрүүгийн хуулийн 95 дугаа зүйл ангиар шалгагдаж, Прокурорын байгууллагад шилжээд байгаа гэдгийг албаны эх сурвалж онцлов.