МАХН-ын дарга Н.Энхбаярт өнгөрсөн оны наймдугаар сард ЦЕГ-ын Зохион байгуулалттай гэмт хэрэгтэй тэмцэх газраас дахин эрүүгийн хэрэг үүсгэсэн. Тодруулбал, түүнд үүсгээд буй хоёр дахь хэрэг бол “намын байр”-ны асуудал. Сүхбаатар дүүргийн нэгдүгээр хороонд байрлах “Имтериал Гоулд” ХХК-ийн өмчлөлийн 900 метр квадрат талбай бүхий уг байрыг МАХН-ын дарга Н.Энхбаяр АНУ-ын иргэд Гинсбургаас худалдан авахдаа залилан мэхлэх аргаар худалдаж авсан гэдэг. Уг АНУ-ын иргэн цагдаагийн байгууллагад гомдол гаргаснаар МАХН-ын дарга Н.Энхбаярт Эрүүгийн хуулийн тусгай ангийн 148.4-т зааснаар бусдын эд хөрөнгийг залилан мэхлэх аргаар авсан хэмээн эрүүгийн хэрэг үүсгэсэн юм.

              Гэвч тухайн үед МАХН-ын дарга Н.Энхбаяр эх орондоо байгаагүй. Тэрбээр БНСУ-д эмчилгээ хийлгэж байсан билээ. Хуулийн байгууллагаас Н.Энхбаярт эрүүгийн хэрэг үүсгэсэн учраас албадан авчирна гэх мэдээлэл цацагдаж байсан ч түүнийг албадан авчраагүй. Учир нь Н.Энхбаярын эмчлүүлж байсан Солонгос эмнэлгээс түүнд зайлшгүй эмчилгээ хийж байгаа гэх албан бичгийг хуулийнханд хүргүүлснээр Н.Энхбаярын хэргийг түр түдгэлзүүлээд байсан юм.

            Тэгвэл битүүний өдөр “сэтгэл”-ээ Монголд эмчлэхээр ирсэн Н.Энхбаярын хэргийг цагдаагийн байгууллагаас сэргээн шалгахаар болсон байна. Нэгэнт тэрбээр хил нэвтрэн орж ирсэн учраас хуулийнхан Эрүүгийн хуулийн тусгай ангийн 148.4-т заасан бусдын эд хөрөнгийг залилан мэхлэн авсан гэх хэргийг нь сэргээхээр болжээ. Хэрвээ Н.Энхбаярын гэм буруутай нотлогдвол эд хөрөнгөө хураалгаж, 10-15 жилийн хорих ялаар шийтгүүлнэ.

         Н.Энхбаяр битүүний өдөр эх орондоо ирсэн даруйдаа “Би биеэ БНСУ-д, сэтгэлээ Монголд эмчилнэ” гэж мэдэгдсэн. Мөн “Намайг Монголд ирвэл баривчилна гэж мессеж ирсэн. Гэхдээ би айхгүй ирлээ” гэж мэдээлсэн. Тэгвэл Н.Энхбаяр луу мессеж бичсэн хүмүүс хэлсэндээ хүрч, Н.Энхбаярыг шалгахаар боллоо.
Н.Энхбаярт залилуулсан хэмээн шалгуулахаар гомдол гаргасан АНУ-ын иргэн нь АНУ-ын тэргүүн хатагтай асан Хиллари Клинтоны төрсөн дүү Келлигийн нөхөр аж.

          МАХН-ын дарга өмнө нь авлига хээл хахуулийн хэргээр гурван шатны шүүхээс 2.6 жилийн хорих ял сонссон ч нэг жилийн хорих ялаа эдэлсэний дараа МУ-ын Ерөнхийлөгч Ц.Элбэгдорж өршөөл үзүүлж суллагдсан юм.
Юутай ч Монгол Улсын гуравдахь Ерөнхийлөгч, МАХН-ын дарга Н.Энхбаярт дахин “аавын хаалга” татахвий гэсэн айдас төрж эхэллээ.