Нийслэл дэх улсын харьяат 1, 2, 3 дугаар амаржих газар болон ЭНЭШТ-ийн ачаалал хэрээс хэтэрч, эхчүүд төрөх өрөөнд 4, 5-уулаа хэвтэж, шинэ үрсээ нэг орон дээр зэрэгцүүлэн хүлээн авч байгаа талаар бүгд л мэдэж байгаа. Тиймээс ч ХУД-т 300 ортой “Нийслэлийн дөрөвдүгээр амаржих газар”-ын барилгыг эхлүүлээд, хөрөнгө мөнгөний асуудлаар царцаачихсан. Эдийн засгийн хүндрэлтэй холбон энэ онд царцаагдсан төрөх эмнэлгийн барилгын ажлыг үргэлжлүүлэхээр ганц тоосгоны ч мөнгө төсөвт суутгаагүй. Тэгэхээр ээж нарыг төрөх орон дээрээ оочирло гээд зөнд нь орхичихсон хэрэг.
Харин үүнийг хараад сууж чадахгүй, хандив тусламжийн аргаар ч болов мөнгө олоод эх нялхсаа шинэ эмнэлэгт хүлээн авъя гэсэн чин сэтгэлтнүүд тоглолт хийж хандив цуглуулахаар болжээ. Тодруулбал, Нийслэлийн Хоёрдугаар амаржих газрын  мэдээгүйжүүлэг, эрчимт эмчилгээний их эмч О.Энхмаа Мөн сэтгүүлч Г.Чинзориг нар “Энхрий үрсээ халуун сэтгэлээр өлгийдөцгөөе”  аяныг өрнүүлжээ.

Царцсан амаржих газрын барилгын ажлыг үргэлжлүүлэх, улсаас өгч чадахгүй мөнгийг ийнхүү ард түмнээсээ “босгохоор” шийдсэн хэрэг. Аяны хүрээнд  3 сарын 27-ны өдөр Улаанбаатар паласын их танхимд  “Энхрий үрсээ халуун сэтгэлээр өлгийдөцгөөе”  урлагийн тоглолтыг зохион байгуулах гэж байгаа юм байна. Тоглолтод Монголын  рок, попын бүх одод оролцох бөгөөд мэдээллийн дагуу тоглолтод оролцох уран бүтээлчдийн тоо нэмэгдсээр байгаа аж.

Түүнчлэн байгууллагуудаар хандивын хайрцаг аялуулах, үүрэн холбооны операторуудтай хамтран ажиллах зэрэг ажлыг төлөвлөөд байгаа гэнэ.

Тоглолтын болон аяны дэлгэрэнгүй мэдээллийг 9925-2540  болон 9974-8016 дугаараас тодруулах боломжтой.