Нарны гэрлийн энергийг боломжтой үед нь түлхүү ашигласнаар цахилгаан эрчим хүчийг хэмнэх зорилгоор манай улс БНМАУ-ын Сайд нарын Зөвлөлийн / хуучин нэрээр/ 1983 оны 51дүгээр, 1985 оны 74 дүгээр, Засгийн газрын 2001 оны 93 дугаар тогтоолын дагуу жил бүрийн 3 дугаар сарын сүүлчийн долоо хоногт Баасан гарагаас 9 дүгээр сарын сүүлийн долоо хоногийн Баасан гараг хүртэлх хугацаанд Монгол Улсын нутаг дэвсгэрт цагийн тооллыг нэг цагаар урагшлуулан ажил, үйлчилгээний эхлэх цагийн хуваарийг хэвээр мөрдөж байсан нь тодорхой салбарын үйл ажиллагаа иргэдийн амьдралд ач холбогдлоо өгч иржээ.

             Цагийн тооллыг урагшлуулж байгалийн гэрлийг ашиглах нь эрчим хүч хэмнэх, ажлын цаг эрт тарж иргэдийн амралт, чөлөөт цаг нэмэгдэх, тариа ногоо тарих болон хувийн аж ахуй эрхлэх, үйлчилгээний байгууллагад үйлчлүүлэгчдийн тоо өсөх зэрэг эерэг боломжийг олгодог тул “Зуны цагийн тоололд шилжүүлэх тухай” Засгийн газрын тогтоолын төслийг дахин боловсруулж танилцуулжээ. Эл тогтоолын төсөлтэй холбогдуулан Засгийн газрын тухай хуулийн 30 дугаар зүйлийн 1 дэх хэсэгт заасныг үндэслэн МУ-ын Засгийн газраас тогтоол гаргажээ. Уг тогтоолд жил бүрийн 3 дугаар сарын сүүлчийн долоо хоногийн Баасан гарагаас Бямба гарагт шилжих шөнийн 02 цагаас эхлэн 9 дүгээр сарын сүүлчийн долоо хоногийн Баасан гарагаас Бямба гарагт шилжих шөнийн 00 цаг хүртэлх хугацаанд Монгол Улсын нутаг дэвсгэрт цагийн тооллыг нэг цагаар урагшлуулан ажил, үйлчилгээний эхлэх цагийн хуваарийг хэвээр мөрдөж байхаар тогтоожээ.