Өвлийн адаг сарын хүйтэн жавартай өдрүүдэд үнийн хөөрөгдлийг буулга гэж саарал ордны өмнө жагсаж байсан МҮЭХ-ныхон Засгийн газартай нэг ширээнд суусан нь өнгөрсөн долоо хоногийн бидэнд хамгийн их хамаатай үйл явдал байлаа. Сайд дарга нар МҮЭХ-ны ерөнхийлөгчтэй хэлэлцэж үнийн хөөрөгдлийг намжаах гарц боловсруулснаа өнгөрсөн даваа гарагт мэдэгдсэн нь хонгилын үзүүрт бага ч гэсэн гэрэл асаасан. Гэсэн ч хугас өдрийн дараа л гэхэд олны анхаарал АН-ын ажлаа өгсөн дэд сайд нарын оронд томилогдсон шинэхэн сайдууд дээр шилжсэн байв. Өмнөх сайдын томилгоог бодвол хэл ам, бартаа саадгүй болсон ч бизнесийн төлөөлөл улс төрд орж ирлээ гэсэн хүчтэй шүүмжлэлээс гадуур байсангүй. “МАК” группын Н.Номтойбаяр, “Монполимет”-ийн Ц.Гарамжав, “Бишрэлт” группийн Б.Ундармаа гэж хэн бэ? гэсэн бяцхан эрэл хайгуул долоо хоногийн турш үргэлжлэв. Засагт ороод бизнесээ хийгээд эхлэх вий гэсэн зүй ёсны хардлага ч явж байлаа. МАН энэ сонгуулийн дөрвөн жилд анх удаа бүх хариуцлагыг нуруундаа үүрэх болсон тул эдийн засгийн туршлагатай хүмүүсийг дэдийн суудалд суулгасан гэж өмөөрөх нь ч байсан юм. Буйрандаа эзэн суусан ноён шиг пээдгэр байх болсон МАН жанжин Д.Сүхбаатарын мэндэлсэн ойгоор УИХ-ын чуулганаас завсарлага авч Бага хурлаа хийн бүтэн өдрийн турш ордонд үзэгдээгүй билээ. Пүрэв гарагт Төрийн ордны улаан хивс ганц өдөр ч гэсэн элэгдэлгүй өнжсөн ч чуулганаар хэлэлцэх ёстой асуудлууд хойшлогдож орхисон. Багш нарын цалин, ахмадуудын тэтгэврийн хэдийг нэмэхийн тулд төсвийг хаанаас нь танаж хасах вэ гэсэн чухал асуудал байхад ажлаа цалгардууллаа хэмээн АН-ын гишүүд ил биш ч далдуур үг хаяж дуулдсан юм.  
   Ерөнхий сайд агаарын бохирдлын талаар энэ Засгийн газар чухам юу хийснийг асууж нээлттэй хурал хийсэн. Гэсэн ч суга таягтай Ц.Нямдорж сайдаас өөр “мөнгөний гарз” болсныг хэлчих “хоншоортой” нэгэн байсангүй. Тоо ярьсан бас нэгэн үр дүн багатай хурал байв. Энэ мэтчилэн өнгөрсөн долоо хоногт гишүүд дорвитойхон хууль ч хэлэлцсэнгүй, энд тэнд хуралд сууж, ямар нэгэн холбоо үүсгэж, үүсгэлцсээр байлаа. Тухайлбал, УИХ-ын гишүүн С.Эрдэнэ, З.Энхболд тэргүүтэй Ардчилсан хүчний холбооныхон гишүүн нь жилд хагас сая төгрөгийн хандив өгч байх дүрэмтэй  “Шонхор” нэртэй албан ёсны фракц үүсгэж байгаагаа мэдэгдсэн. Нэрнийхээ учрыг “улс төрийн онол, номд барууны үзэлтэй улстөрчдийг шонхор, зүүний үзэлтэй улстөрчдийг тагтаа гэдэг” хэмээн тайлбарласан тэд цаагуураа зүүний намуудын хэмжээ, дамжааг “жижигрүүлж” орхив бололтой.  
   С.Ганбаатар үнийн асуудлаар Т.Ганди сайдтай нэр холбогдож, шинэ дэдүүд шинэ ажилтайгаа бартаа саадгүй танилцаж, МАН-ын бага хурлын гишүүд нэг ч муу үггүй хурлын танхимд тэврэлдэж, Ардчилсан хүчний холбоо “Шонхор” фракц байгуулж дурлалын холбоо үүсгэв.  Харин энэ дурлалын хэлхээ холбоо ямар үр дүн авчрахыг шинэ долоо хоног харуулна. Энэ долоо хоногт УИХ-ын намрын чуулган өндөрлөх тул “долоо хоногийн баатар” ч төрөхөөр улс төрийн халуун өдрүүд үргэлжилэх буй.