Ардчилсан хүчний холбооноос гарсан “Шонхор” фракцынхан сэтгүүлчдэд чухам ямар хүсэл, зоригтой байгуулагдаж байгаа талаараа мэдээлэл хийлээ. З.Энхболд, С. Эрдэнэ, Г.Баярсайхан, Д.Одхүү, Д.Ганхуяг нарын гишүүд улс төрийн хувьд бодлого, хандлага нь ил тодорхой, шаардлага гарвал гудамжинд гараад жагсаж чадах хүчтэй бүлэг байгуулж байгаагаа хэлсэн юм. Аливаа нам, АН ч гэсэн дотроо асуудалд хандах хандлага нь зөрүүтэй байдаг. Тухайлбал сонгуульд ялсан нам нь нөгөө намаа уриад найран дундаа явахыг эсэргүүцсэн гишүүд АН-д ч, МАН-д ч байсан. Дээрх гишүүд намын эрх ашгийг хойш нь тавиад улс орны асуудлыг нэгдүгээрт тавьдаг бүлэглэлийг бий болгосноо хэлж байсан юм.

Энэ бүлэг байгуулагдсан даруйд АН-ын даргын суудлыг ганхуулах гэж байна гэсэн яриа гарч байсан. Үүнд З.Энхболд гишүүн “Хэрэв нэг хүнийг халах солих байсан бол тун амархан ажил. МАН дотор ч гэсэн ардчилсан үзэлтэй гишүүд байдаг. Нам бус төрийн албан хаагчид ч байна. Бид шударга байдлыг дэмждэг олон хүн бий болж, энэ ажилд гар бие оролцоосой гэж хүсч байна. Мөн сонгуулийн өмнө гэнэт Ардчилсан хүчний холбооны үйл ажиллагаа идэвхитэй болсон нь тусдаа нам байгуулах гэж байгаатай холбоотой гэсэн яриаг тэд үгүйсгэсэн юм.

   “Шонхор”-уудын нэн тэргүүнд тавьж байгаа зорилго нь байгалийн баялагийн хуваарилалтыг шударга явуулах хөгжлийн стратеги байна гэж тодорхойлжээ. Байгаль орчны талаар багагүй санаа тавьдаг Г.Баярсайхан гишүүн “Монголд байгаль экологийн салбарт хуучирсан технологи ашиглаж байгаа нь экологийн колончлол, хортой химийн бодис хэрэглэж байгаа нь экологийн терроризм. Тиймээс үүний эсрэг “Шонхор” фракцынхан тэмцэнэ. Уул уурхайн салбараас олсон орлогын нэг хувийг  “Экологийн сан”-д хуримтлуулж байгальд ээлтэй ААН, иргэдийн урамшуулах болно” гэв. Тэд ерөнхийлөгч, намын дарга хэн ч байсан шударга ёсыг алдагдуулбал эсэргүүцэж, намын ил тод байдлыг дэмждэг гэдгээ хэлж байв.

  Сонгуулийн өмнө далавчаа дэвж эхэлсэн “шонхор”-ууд шударга бус явдалтай тэмцэнэ гэдгээ хэлсэн. Тэгэхээр энэ олон шударга бус хүмүүсээс хэнийг  эхэлж ангуучлах бол гэдэг тэдний хэлээгүй үлдсэн хүслийг улам бүр тод болгох юм.

Б.Баяр