Улаанбаатар хотын захирагчийн ажлын албанаас СӨХ-нуудын дээд зөвлөлтэй хамтран нийслэлд байгаа СӨХ-уудад шалгалт хийжээ. Ажиллагааны үр дүнд уг зөвлөлийн гишүүн СӨХ-нууд харьцангуй хангалттай, гишүүн бус холбоонууд хангалтгүй байгааг тогтоосон байна. Тухайлбал, гишүүнчлэлтэй 342 байгууллагаас 18 нь бүрэн хангалттай, 291 нь хангалттай, 33 нь хангалтгүй байсан аж. Харин гишүүн бус 162 холбоодын 43 нь хангалттай үнэлгээ авсан бол бусад нь тэнцээгүй гэнэ.

   Гишүүн бус холбоод яагаад дийлэнх нь хангалтгүй байгааг холбогдох албаныхан тайлбар-лажээ. Тэдний хэлснээр уг СӨХ-доос оршин суугчдаасаа хол хөндий, хамтарч ажилладаггүй, хурлаа тогтмол хийдэггүй, нэр төдий байдаг, подваль ашиглалт хангалтгүй, мэргэжлийн байгууллагуудтай хийсэн гэрээний үүргээ биелүүлдэггүй зэргээс шалтгаалжээ. Энэ мэт цахилгаан шат, орц, дээврийн засварын хөрөнгийг шийдээд, дэмжээд байхад ажил нь хангалтгүй СӨХ-дыг дөрөвдүгээр сарын 1-н гэхэд асуудлыг нь шийдэхийг хотын дарга үүрэг болгов.
 
   Өнгөрсөн онд улс болон нийслэлийн хөрөнгө оруулалтаар 70 байрны дээвэр засварлахад 1.7 тэрбум төгрөг, 130 орцны цахилгаан шат шинэчлэхэд дөрвөн тэрбум орчим төгрөг зарцуулжээ. СӨХ-нууд ч өөрсдийн хүч хөрөнгөөр өнгөрсөн онд 1.8 тэрбум орчим төгрөгийн урсгал засвар хийснээр энэ өвлийг онц хүндрэлгүй давж байгаа гэнэ.