Иргэдийн дунд орон сууцны хөнгөлөлттэй зээл хүлээлт үүсгээд  байсныг  ойрын өдрүүдийн ачаалал харуулж байна гэж ОССК-ийн гүйцэтгэх захирал Ж. Алдаржавхлан хэлэв.  Өдөрт 500-600 иргэн хөнгөлөлттэй зээлийн талаар мэдээлэл авахаар тус байгууллагад хандаж буй гэнэ. ОССК-аас найман бүртгэгч ажиллуулж,  мэдээлэл өгүүлэхийн зэрэгцээ www.оssк.mn сайтаар энэ тухай мэдээг иргэдэд хүргэж байгаа аж. Иргэд шаардлагатай материалуудыг бүрдүүлсэн бол энэ сарын 12-ноос хойш 2016 он хүртэл иргэдэд үйлчлэх юм. Бэлтгэл ажил үргэлжилж байгаа бөгөөд Чингэлтэй дүүргийн Баянбүрдийн аюулгүйн тойргийн ард байрлах байрандаа иргэдийн бичиг баримтыг авах юм байна. Одоогийн байдлаар иргэдэд орон сууцны хөнгөлөлттэй зээл олгох боломжтойгоо Төрийн банк, Капитал банк илэрхийлжээ. Цаашдаа арилжааны банкнуудын тоо нэмэгдвэл энэ ажил иргэдэд хүндрэл чирэгдэл багатай хүрч, иргэд нэг зэрэг хамрагдах боломжтой гэдгийг энд  онцлов.  Хөтөлбөр 2016 он хүртэл үргэлжлэнэ.

   Жилийн зургаан хувийн хүүтэй 20 жилд эргүүлэн төлөх нөхцөлтэй орон сууцны хөнгөлөлттэй зээлийг иргэдэд олгох талаар  өнгөрсөн жилээс судалжээ. Сингапур улсад МУ-ын ерөнхий сайд С. Батболд ажлын айлчлал хийх үеэр Нийслэлийн Засаг дарга бөгөөд Улаанбаатар хотын Захирагч Г. Мөнхбаяр,  ОССК-ийн гүйцэтгэх захирал Ж.Алдаржавхлан нар тус айлчлалын бүрэлдэхүүнд багтаж Сингапур улс иргэдээ хэрхэн орон сууцны хөнгөлөлттэй зээлд хамруулсан талаар туршлага судалсан байна. Иргэдээ богино хугацаанд орон сууцжуулсан туршлагаараа тус улс алдартай. Улмаар Засгийн газрын тогтоолын дагуу Сангийн сайд, ЗТБХБЯ-ны сайд, Нийслэлийн Засаг дарга нар “Иргэдийг жилийн 6 хувийн хүүтэй орон сууцны хөнгөлөлттэй зээл”-д хамруулах харилцааг зохицуулах журмыг 2012 оны 2 дугаар сарын 20 ны өдөр баталсан юм.