2012 оны сонгууль болоход гурван сарын хугацаа үлдлээ. Улс төрийн намууд аль гишүүнээ хаана томилохоо нууцалж байгаа энэ цагт зарим нэг нам УИХ-д нэр дэвших гишүүдийнхээ нэрсийг олонд зарлаад байгаа юм. Тухайлбал ирэх сонгуульд МАХН-аас их аварга Асашёорюү Д.Дагвадоржоос эхлээд олон сонирхолтой хүмүүс УИХ-д нэр дэвших гэнэ. Их аварга Асашёорюү Д.Дагвадорж өөрийн төрсөн нутаг Өвөрхангайд нэр дэвшиж өрсөлдөхөөр болжээ. Түүнийг зодог тайлсны дараагаас л сонгуульд нэр дэвшиж, улс төрд орох эсэхийг нь хүмүүс сонирхож эхэлсэн. Таны дараагийн алхам улс төр мөн үү? гэсэн сэтгүүлчийн асуултанд тэрбээр нэг ч удаа үгүй гэж хариулж байгаагүй юм. Сүүлийн үед хэвлэлээр ямагт л муугаар бичүүлэх болсон их аварга маань өвөрхангайчуудын итгэлийг олж УИХ-ын гишүүн болж чадах болов уу, яах бол? МАХН-аас нэр дэвших гэж буй дараагийн бөх даян аварга А.Сүхбат. Тэрээр улс төрд хүч үзэхээр шийдэж өөрийн төрсөн нутаг Төв аймагтаа сонгуульт ажлаа эхлүүлээд байгаа гэнэ. А.Сүхбат аварга тус аймгаас гарах магадлал нэлээн өндөртэй хүний нэг юм. Нэгэн цагт Монгол бөхийн дэвжээнд од болон гялалзаж, олны хайр хүндэтгэлийг хүлээж явсан аварга маань улс төрийн тавцанд гарахаар ханцуй шамлан орсон байна.
Тус намаас УИХ-д нэр дэвших дараагийн хүн бол дуучин МУГЖ, С.Жавхлан. Тэрээр бөх биш ч урлагийн тайзнаа их аваргын дайтай хэлэгдэх хүн билээ. Түүнийг ирэх сонгуульд өрсөлдөхөд гайхаад байх хүн тийм ч олон биш. 2008 оны нөхөн сонгуульд Чингэлтэй дүүрэгт нэр дэвшээд амжилт олж чадаагүй гавьяат маань энэ удаа эртнээс сонгуульт ажилдаа бэлдэж эхэлжээ. Тэрээр энэ сарын 7, 8-ны өдрүүдэд UB Palace-д “Галаа манасан монгол бүсгүй” тоглолтоо эхчүүд эмэгтэйчүүддээ зориулж тоглоно. Тоглолтоос олсон орлогоо 21 аймаг, 6 дүүргийн хамгийн өндөр настай, өрх толгойлсон ээжид тарааж өгнө гэдгээ мэдэгдсэн. Хамгийн багадаа 27 ээжид сая төгрөг өгөх гэнэ. С.Жавхлан сонгуулийн сурталчилгааны ажлаа эхлүүлж нэг сая төгрөг тарааж байгаа бол тэрээр хууль зөрчиж байгаа юм. Учир нь ямар нэгэн бэлэг, эд материал, бэлэн мөнгө тараахыг сонгуулийн тухай хуулиар хориглочихоод байгаа юм.
Т.Хулан
