Энэ оны эхний хоёр сарын байдлаар нүүрсний экспорт улсын нийт экспортын 34.6 хувийг эзэлж байна. Австралийн хөрөнгийн биржид бүртгэлтэй "Хүннү коал" компани Үнст худаг нүүрсний ордын нөөцийг жорк ангиллаар тооцож гаргасан байна. Улаанбаатараас 360 км-ийн зайд оршдог Дундговь аймгийн Гурвансайхан сумын нутагт байрлах Үнст худаг орд нь 676 сая тонн нүүрсний нөөцтэй нь саяхан тогтоогджээ. Үүнээс 541 сая тонн нь баталгаатай нөөц бөгөөд 60 сая тонн боломжит нөөцтэй аж. Нийт 325 өрөм зоож, 28245 метрийн гүнд өрөмдлөгө хийснээр энэ үр дүнд хүрчээ. Тус компанийн өөр нэг төсөл Цант-Уулын нүүрсний орд 90 сая тонн сайн чанарын нүүрсний нөөцтэй нь тогтоогдсон байна. Ингэснээр "Хүннү коал" компанийн эзэмшдэг нүүрсний ордууд нийтдээ 766 сая тонн "жорк"-оор баталгаажсан нөөцтэй болоод байна. Нөөцөө "жорк" ангиллаар тогтоосноор "Хүннү коал" нь Монголын нүүрсний томоохон компанийн нэг болж байна. Өнгөрсөн гуравдугаар сард Тайландын нүүрсний магнат "Banpu Minerals"  "Хүннү Коал" компанийн 12.39 хувийг 45 сая ам.доллароор худалдаж авсан. Тэгвэл Монголд нүүрсний хэд хэдэн төсөл хэрэгжүүлж буй Австралийн "Хүннү Коал" –ийг  "Ваnpu Minerals" компани 477 сая ам.доллараар худалдаж авах саналыг саяхан тавьжээ. Харин үлдсэн хувийг нь өөрийн болгоход шаардлагатай зөвшөөрлийг Австралийн гадаадын хөрөнгө оруулалтыг хянах зөвлөл, Тайландын банкнаас авсан байна. Тиймээс "Хүннү коал" компани удахгүй "Banpu Minerals" компанийх болох аж.

Т.Энхэлээ