Нийслэлийн цагдаагийн газрын Хэв журам хэлтсийн даргаар ажиллаж байсан дэд хурандаа Г.Ганбаатарт холбогдох шүүх хурал өнөөдөр болсон. Хэдийгээр түүнийг өнгөрсөн лхагва гаригт Ч.Амарболд нартай хамт шүүх байсан ч өмгөөлөгч нь ирээгүй гэх шалтгаанаар хэргийг нь тусгаарласан юм. Харин өнөөдрийн шүүх хуралд түүний өмгөөлөгч хавтаст хэрэгтэй танилцаагүй гэх шалтгаанаар хойшилсон. Мөн буцаад Ч.Амарболд нартай хэргийг нь хамт хянахаар болсон юм. Энэ хугацаанд түүнийг цагдан хорих шийдвэрийг шүүх бүрэлдэхүүн гаргасан юм. Ингээд хурлын талаар түүний өмгөөлөгч Т.Мөнхдэлгэрээс зарим зүйлийг тодруулав.
-Шүүх хурал ямар шалтгаанаар хойшлов?
-Хоёр шалтгаанаар хойшлууллаа. Нэгдүгээрт, шүүгдэгч Г.Ганбаатарыг өмгөөлөгч авах эрхээр нь хангаж байна. Би хавтаст хэрэгтэй бүрэн танилцах хэрэгтэй байна. Хоёрдугаарт, Г.Ганбаатарын хэргийг өмнөх гурван хурандаагийн хэргээс тусгаарлачихсан байсан. Үүнийг цуцлаад, хэргийг урьдын адилаар нэгтгэхээр боллоо.
-Өнөөдрийн шүүх хурлын талаар?
-Өнөөдрийн шүүх хурлаас хууль бус хоёр шийдвэр гарлаа. Шүүгдэгч Ч.Амарболдын өмгөөлөгч О.Алтангэрэл шүүгдэгч нартай холбоотой асуудлаар Монгол Улсын үндсэн хуулийн цэцэд гомдол гаргасан байгаа. Уг гомдлын дагуу Үндсэн хуулийн цэцэд маргаан үүсгээд шалгаж байгаагаа Сүхбаатар дүүргийн шүүхэд ирүүлсэн байгаа. Эрүүгийн байцаан шийтгэх хуулийн 229 дугаар зүйлийн 1.3 дахь хэсэгт энэ талаар тодорхой заасан байдаг. Цэц дээр маргаан үүсгэн, шалгаж байгаа тохиолдолд хэргийг түдгэлзүүлэх ёстой. Гэтэл энэ шийдвэр бол хэрэгжсэнгүй. Өөрөөр хэлбэл, шүүх цэцийн шийдвэрийг зөрчиж байна гэсэн үг л дээ. Тэгэхээр шүүх, тэр дундаа Сүхбаатар дүүргийн шүүх бол Үндсэн хуулийн цэцээс дээгүүр эрх мэдэлтэйгээр үйл ажиллагаа явуулж байна гэсэн үг. Дараагийн хууль зөрчсөн асуудал нь миний үйлчлүүлэгч Г.Ганбаатарын цагдан хорихоор боллоо. Энэ бол үндэслэлгүй шийдвэр. Учир нь Эрүүгийн хуулийн 68 дугаар зүйлд энэ талаар тодорхой заасан нь бий. Тодруулбал, оргон зайлсан, дахин гэмт хэрэг үйлдсэн буюу үйлдэхийг завдсан, өмнө авсан таслан сэргийлэх арга хэмжээг зөрчсөн, гэсэн үндэслэлүүдээс аль нэг нь тогтоогдвол шүүгдэгчид өмнө авсан таслан сэргийлэх арга хэмжээг өөрчилж, цагдан хорьж болно гэж заасан байгаа. Бэлээхэн ийм хууль байсаар атал хууль зөрчөөд үндэслэлгүйгээр цагдан хорих шийдвэр гаргачихлаа. Энэ юуг харуулж байна гэхээр шүүхийн байгууллагаасаа эхлээд байцаан шийтгэх хуулиа зөрчөөд байна. Тэгэхээр хууль хаана хэрэгжих юм бэ, хаана хэрэгжүүлж, хаана сахих юм бэ гэдэг эргэлзээтэй байдал үүсч байгаа юм.
-Та хэзээнээс Г.Ганбаатар хурандаагийн хэрэг дээр өмгөөлөл үзүүлэхээр болсон бэ. Хавтаст хэрэгтэйгээ бүрэн танилцаж дуусаагүй юм байна шүү дээ?
-Миний хувьд хэдхэн хоногийн өмнөөс энэ хэрэг дээр ажиллахаар болсоноо мэдлээ. Энэ хэрэг бол нэлээд олон хавтаст хэрэгтэй байгаа. Одоогоор дөнгөж танилцаж эхэлж байна. Тиймээс хэргийн нарийн ширийнийг тодорхой ярих боломжгүй. Ямартаа ч шүүх хууль бус шийдвэрийг дахин гаргалаа.
-Хавтаст хэрэгтэй танилцахад хэр хугацаа шаардах бол. Таныг хэрэгтэй танилцаж дуустал шүүх хурал явдагдах боломжгүй болж байгаа юм байна гэж ойлгож болох уу?
-Үүнийг яг сайн хэлж мэдэхгүй байна. Ямартаа ч нэлээд цаг зав шаардлагатай болох байх. Шүүх цагдан хорих шийдвэр гаргахдаа яг тэдний өдөр хүртэл эл шийдвэр хүчин төгөлдөр байна гэж нарийвчлан зааж өгсөнгүй. Ямартаа ч миний хувьд бол одооноос эхлээд хавтаст хэрэгтэйгээ танилцаад эхэлнэ. Хавтаст хэрэгтэй танилцаж дуусаагүй гэдэг үндэслэлээр хурал хойшлуулаад байхгүйг л бодно.
Б.Чимэг
