Өчигдөр УИХ-ын гишүүн Х.Баттулга Хууль зүй, дотоод хэргийн сайд Ц.Нямдорж “Энержи ресурс” компаний байранд амьдарч байгаа. “Энержи ресурс”-ийн хууль бус үйл ажиллагаатай холбоотой тул АТГ-т шалгуулна гэж МҮОНРТ-ийн нэвтрүүлгээр орохдоо мэдэгдсэн. Тэгвэл өнөөдөр Ц.Нямдорж сайд ЗТБХБ-ын сайд асан Х.Баттулга солонгос болон хятадуудтай нууц гэрээ хийсэн тухай мэдээллийг дэлгэв.

Ц.Нямдорж сайд “2011 оны гуравдугаар сарын 19-нд Х.Баттулга нууцаар Солонгос, Хятадын хамтарсан групптэй байгуулсан “Төмөр зам барих нууц гэрээ”-г мэддэг хүн Монголд бараг байхгүй.  Ямар учиртай юм бэ гээд хууль зүйн талаас нь шалгах гэхээр ийм гэрээ байгуулаагүй гэж худлаа хэлээд материалыг нь өгөхгүй байна. Энэ улсуудтай  уул уурхайн лицензийг барьцаалж гэрээ хийж байх үед Хятад улсын холбогдох яамны хүмүүс ирж санамж бичигт гарын үсэг зурсан. Хятадын салбарын дэд сайд нь Бээжингийн онгоцны буудал дээр буухад өчигдөр зурсан санамж бичиг  чинь хүчингүй шүү гэж Монголын талаас мэдэгдсэн. Энэ мэт хууль бус ажлаас нь болж Таван толгой гацчихаад байна. Гэтэл сүүлд нь төмөр замын ажил Ц.Нямдоржоос болж гацаж байна гэж мэдэгдэж байгаа нь буруу” гэсэн юм.

  Уг 20 хуудас гэрээ нь Чойбалсан хүртэлх 1100 км төмөр зам барих тухай аж. Гэрээнд  төмөр замыг 2.1 саяас 2.5 сая ам.доллар, нийтдээ 2.5 орчим тэрбум ам.доллар зарцуулагдана гэж тооцсон байжээ. Хэрэв энэ ажил нь амжилттай болвол Гашуун сухайт, Нарийн сухайтын чиглэлд төмөр зам барих ажлыг ч хийлгэхээр тусгасан байсан гэнэ. Энэ мэт хууль бус гэрээнүүдээс болж Оюутолгой, таван толгойн ажил явахгүй байгаа гэж Ц.Нямдорж сайд хэлсэн юм.  Х.Баттулга сайд түүнийг “Энержи ресурс”-ын байранд амьдардаг гэсний хариуд дараах мэдэгдлийг хийв.

“ЗТБХБ-ын сайд байсан Х.Баттулгын орон тооны бус зөвлөх Ууганбаяр гэдэг хүн урагшаа явж, 300 сая ам.долларын зээлд ихээхэн оролцсон байдаг. Сүүлд нь эл мөнгөөр “Шинэ Яармаг” гэдэг хороолол барихад Монголын талын оролцогч нь Ууганбаярын хувийн компани болж таарсан. Олон удаа би ЗТБХБЯ-ныханд хууль дүрмийн дагуу ажиллахыг сануулж, хулгай зэлгийгээ болиорой гэж хэлсэн. Шударга ажилла, би та нарыг дагаж шоронд орж чадахгүй гэсэн. Түүнээс би Ухаа худгаас байр авчихаад барилгын ажлыг зогсоогоод байгаа юм биш” гэв.