“Эрдэнэт үйлдвэр” ХК-ий захирлаар улиран ажиллаж байгаа ерөнхий захирал Ч.Ганзоригийн эрх мэдэл үйлдвэрээсээ хальж гараад олон жил болж байна. Аймгийн засаг даргын эргэн тойронд өөрийнхөө хүмүүсийг тавихаас гадна Булган аймгын Бугат сумын нутагт байх  Бумбат уулыг бараг л өөрийн мэт эзэмших болжээ. Хурдан морины “хобби” сонирхолтой тэрбээр бүхэлд бүтэн уулыг өөрийн “эрх” морьдддоо зориулан өмчилж авчээ. Анх 2008 онд “Эрдэнэт үйлдвэрийн захирал болсон даруйдаа Бугат сумын малчнаас уулын аман дахь багахан өвөлжөөг нэг сая төгрөгөөр худалдаж авч байжээ. Харин одоо бол өвөлжөөний газраа томруулж, Бумбат уулыг томруулан банзан хашаа хатгажээ. Тэр хашааны банзыг нь нутгийн зарим иргэд хулгайлж, түлшинд хэрэглэж байгаа тул дараа жилээс бетонон хана босгохоор ярьж байгаа гэж ойр хавийн ярина. Энд халуун, хүйтэн гэсэн хоёр жүчээ бий. Ч.Ганзориг захирлын Араб, Англиас авчирсан 300 гаруй адуу нь тэндээ багтахгүй болсон тул  Эрдэнэтээс баруун зүгт орших Бага залуу хэмээх уулын баруун суган доор нэмж жүчээ байгуулжээ. Мэдээж том үйлдвэрийн захирал хүн өөрөө адуугаа манана гэж байхгүй. Нутгийн малчдыг “хоёр жил сайн ажиллавал “Эрдэнэт үйлдвэрт” ажилд оруулж өгнө” гэж амалсан тул тэд нь хаялага сайтай газарт ажилд орохын тулд хичээн зүтгэдэг бололтой юм.
  
   Бумбат уулын жүчээнд нь “Эрдэнэт хурд 2010” төвийн бүсийн уралдаанд түрүүлсэн хар шүдлэн, энэ уралдаанд айргийн тавд орсон хүү Г.Тэмүүлэнгийнх нь бор хязаалан бий. Баячууд үнэтэй, хурдтай мориор зэрэг зиндаагаа тодорхойлдог цаг болсон тул моринд дурласан түүнийг буруутгах аргагаүй. Бэлчээр нутагт нь малаа оруулсан малчдаас бэлчээр, усаа харамлаж их л халгаатай байдаг гэж нутгийнхан ярьдаг. Ганцхан сая төгрөгөөр Бумбат уулыг худалдан авч, бяцхан “вант улс” байгуулсан түүнийг номонд нь оруулах нэг ч хүн энэ аймагт байхгүй бололтой.