“Big Line Film” студийн шинэхэн кино болох  “Бурхан өршөөг” уран сайхны киног улс төрийн захиалгат бүтээл хэмээн үзэж гаргахыг хоригложээ. Энэ сарын 23-н буюу нөгөөдрөөс "Бурхан өршөөг" киног өөрийн театраар гаргахгүй гэдгээ "Өргөө" кино театрынхан мэдэгдсэн байна. Учир нь долоо хоногийн өмнөөс МАН-ыхан энэ киног Ардчилсан намын санхүүгийн дэмжлэг болон захиалгаар бүтсэн кино гэж үзэн гаргахгүй байх талаас нь хөөцөлдөж эхэлсэн байна. "Өргөө" кино театрт ч мөн киног гаргахгүй байхыг анхааруулсан шахалт дарамт ирсэн учраас ийнхүү "Бурхан өршөөг" киног гаргахаа больсон гэнэ. Эмгэнэлт инээдмийн "Бурхан өршөөг" кино нь энэ сарын 1-нд нээлтээ хийсэн бөгөөд төрийн албан тушаалтнуудын хүнд суртал, нийгэмд бугшсан шударга бус үйл явдлыг шүүмжлэн харуулахыг зорьсон ажээ. Киноны ерөнхий найруулагч З.Батболд ардчилсан намаас "Өргөө" кино театрын удирдлагуудад "Бид Ардчилсан намд энэ кино захиалгынх биш гэдгийг нотлох бичиг хийж өгөхийг хүссэн. Өнөөдөр энэхүү нотлох баримтаа авлаа. Үүнд “Бурхан өршөөг” киног Ардчилсан нам захиалж хийлгээгүй бөгөөд энэ кинотой холбоотойгоор уран бүтээлчидтэй холбогдсон зүйл байхгүй хэмээн тусгасан байгаа. Өнөөдөр бид нотлох баримтаа “Өргөө” кино театрын захиргаанд хүргэж өгөх болно” хэмээн мэдэгдлээ. З.Батболд найруулагчтай уулзаж энэ талаар цөөхөн хэдэн асуултанд хариулт авлаа.

 -     Шуудхан хэлэхэд хүн нь тодорхой биш байгаа.  Гуравдугаар сарын 1-нээс  манай “Бурхан өршөөг” кино гарч эхэлсэн. Манай кинонд гардаг агуулга зарим нэг хүнд огт таалагдахгүй байх шиг байна. “Бурхан өршөөг” кинонд төрийн албан хаагч хүн дарга хүмүүст хэрхэн яаж долигнож байгааг харуулдаг. Би киногоороо бүх хүн тийм байдаг гэж хэлэх гээгүй. Ер нь тийм байдаг хүмүүсийн тухай гаргасан юм. Ардчилсан нийгэмд амьдарч байгаа хүн бол ардчилалын үнэ цэнийг яаж ойлгох ёстой юм гэдэг талаар болон чөлөөт үзэл бодлын тухай утга агуулгатай кино хийсэн чинь манай киноноос өөрсдийгөө олж харсан зарим нэг төлөөллүүд киног маань олонд буруугаар ойлгуулаад эхэллээ. “Ардчилсан намын захиалгаар хийгдсэн кино” гэсэн бор шувууг масс дунд нисгээд байгаа юм. Уг нь бол санаа бодол нийлсэн залуусын хамтарч бүтээсэн бүтээл юм. Аль нэг намаас нэг ширхэг зоос ч аваагүй. Ямар нэгэн дэмжлэг ч аваагүй. Би үүнийг албан ёсоор өөрт тань хэлж чадна. Манайхыг намын захиалгат зүйл хийгээд байна гэж олон нийтийн хэвлэлээр цацаад сонин сэтгүүлээр бичиж байна. Тэр дундаа ТВ9 телевизийн 14-ны өдрийн “Энэ өдөр” мэдээллийн хөтөлбөрөөр намын захиалгат кинонууд ар араасаа цувран гарлаа гэдэг сэдэвтэй мэдээн дунд манай киног оруулсан байсан. Кино үзээд гарч ирсэн хүмүүсээс яриа авсан байна лээ. Нөгөө хүмүүс нь аймар сэтгэл санаагаар унчихсан  “Ямар хэцүү юм бэ, Аймар ядарчихлаа” гэж гарч ирж ч байх шиг. Би өөрөө найруулагч хүн хүний тоглолтыг мэднэ шүү дээ. Би иймэрхүү сөрөг зүйлүүдийг эхэндээ үл тоосон. Тэгсэн эцэст нь энэ нь манай хамтран ажилладаг  байгууллага болох “Өргөө” кино театрт бас сөргөөр нөлөөллөө. “Өргөө” кино театрын ажилтан утасдаад “За З.Батболдоо чиний киног бид “Өргөө I” театраасаа буулгахаас өөр замгүй боллоо. Яагаад гэхээр танайхыг улс төрийн сэдэвтэй ардчилсан намын захиалгат киног гаргасан гээд хаах шийдвэр гаргалаа гэж хэлсэн. Ер нь захиралуудын хурлаар ороод үзэгчдийн санал хүсэлтийн дагуу бид хаахаас өөр аргаггүй боллоо гэж хэлсэн. Би өмнө нь олон кино хийж байсан. Миний ойлголтоор бол Өргөө кино театрт бас дарамт үзүүлж байна.

-  Тийм л байх. Гэхдээ МАН-ын гишүүд дэмжигчдийг би элдвээр хэлэхгүй ээ. Нэг хүний эрх нөгөө хүний эрхээр хязгаарлагддаг нийгэм шүү дээ. Гэтэл бидний хэвлэн нийтлэх, үзэл бодлоо чөлөөтэй илэрхийлэх үндсэн хуулийн 16.16-д заасан зүйлийг зөрчиж ингэж гүтгэж доромжилж байна гэдэг нь увайгүй зан чанар. Манай киног үзсэн түүн дотроос өөрсдийгөө олоод харчихсан тэр үзэгч л бидний эсрэг ийм сөрөг зүйл хийгээд байна. Түүнээс биш “Өргөө” кино театрын нэр хүндэд халдах гэсэнгүй. Хүн идсэн хоол руу гаа нулимдаггүй гэдэг үг байдаг шүү дээ. “Өргөө” кино театр манай хоёрын хувьд уран бүтээлийн сайхан түүхүүд байдаг. 2009 оны 4 сарын 18-нд “Өргөө” кино театр “Гоёлын даашинз” киногоор нээлтээ хийж байсан түүхтэй.  Тэр үед “Гоёлын даашинз” Өргөө кино театрт таван сар гарсан. Тэгэхэд “Бурхан өршөөг” кино 15 хоноод бууна гэдэг бол утгагүй асуудал. “Өргөө II” кино театраар манай кино гарч байгаа. Гэхдээ 23-наас хаагдах шинжтэй байна.

-   Санаж байгаа бол би кинон дээр нэг их маркетинг хийгээд байдаггүй. Миний найруулсан “Гоёлын даашинз” “Боолын гэрээ” “Цасан охин” “Сайн уу амьдрал минь” зэрэг кинонууд бол айхтар маркетингтэй байгаагүй. Кино гарахаас өмнө маркетинг хийдэг болохоос араас нь ингэж менежмент хийж явдаг хүн би биш юм. Манай хамгийн их үзэгчтэй байсан “Боолын гэрээ” кино бас л нийгэм дунд нилээн сенсааци дэгдээж байсан. Тэгтэл бид “Боолын гэрээ” киног нэг их рекламдаж байгаагүй. Кино бол ам дамжин яригддаг маркетингтай урлаг шүү дээ. “Үзэгчдийн хүсэлтээр хааж байгаа” гэдэг үгэн дээр л би их эмзэглэж байна.

-   Би гутарсан юм. Хоёр жил гаран кино хийгээгүй. А.П.Чеховын “Түшмэлийн үг” зохиолыг би эртнээс мэднэ. Энэ нийгэмд хүнээ байгаад яваад байгаа хүмүүс олон байдгийг би олж харсан. Таны нүдэнд ч ил байдаг байх. Тэд нарын амьдралаар сэдэвлэж хийсэн. Ийм кино хийсэн нь лусын хорлол шиг юм болчихлоо. Энэ гайтай сонгуулиас болж бид нар хүртэл ийм байдалд орчихоод байна. Сонгууль болох нь зүйтэй. Улс оронд хэрэгтэй асуудал. Гэхдээ миний кино цаг үеэ олж гарсангүй л гэж бодож байна.

-   Би бас тэгэж бодсон. Гэхдээ “Өргөө” кино театрын хамт олонд тийм бодол байхгүй. Энэ бол урлаг түгээдэг соёлын байгууллага. Бид нар бол уран бүтээл хийж байгаа уран бүтээлч хүмүүс. Соёл урлагийн байгууллагыг дээрээс нь дарамталж өөрсдийн үйл ажиллагааг явуулна гэдэг бол тэнэг асуудал.