Долдугаар сарын 1-ний хэрэгт буруутгагдаад буй цагдаагийн экс дарга нарын шүүх хурлыг Сүхбаатар дүүргийн шүүгч Ч.Хосбаяр даргалж байгаа. Гэвч түүнийг улс төрийн зорилгоор, хэн нэгний захиалгаар ажиллаад байна уу гэх хардлага олон нийтийн дунд яригдах болов. Учир нь түүний гаргаж байгаа шийдвэрүүд олон нийтийг ийнхүү хардахад хүргэжээ. Нэгдүгээрт, Энэ сарын 14-нд болсон шүүх хурлаар тэрээр хууль бус шийдвэр гаргав. Учир нь шүүгдэгч Г.Ганбаатарын өмгөөлөгч Д.Оросоо 21 хоногийн хугацаатай БНСУ-д ажлаар яваа учир хуралдаанд ирж чадахгүй гэх шалтгаанаа шүүх хурлын өмнө бичгээр мэдэгдсэн. Гэтэл Ч.Хосбаяр шүүгч түүний илгээсэн албан бичгийг хангалтгүй хэмээн түүнийг 513 мянган төгрөгөөр торгох шийдвэр гаргасан. Шүүх хуралд оролцож чадахгүй гэдгээ хурлын өмнө албан ёсоор мэдэгдсэн өмгөөлөгчийг торгож байгаа нь өмгөөлөгчийн өмгөөллийн тухай хуулиар олгогдсон эрхийг зөрчсөн хэмээн түүнийг буруутгав.
Хоёрдугаарт, Нэгэнт Д.Оросоо өмгөөлөгч шүүх хуралдаанд оролцож чадахгүй учир шүүгдэгч Г.Ганбаатар шүүх хурлыг саатуулахгүй гэсэн үүднээс нэмж өмгөөлөгч авч, хуралд оролцохыг хүссэн. Гэвч Ч.Хосбаяр шүүгч түүний хүсэлтийг хүлээн авалгүй Г.Ганбаатарын хэргийг тусгаарлахаар болов. Түүний гаргасан уг шийдвэрийг шүүгдэгч, хохирогчдын өмгөөлөгч бүр улсын яллагчаар оролцож буй хяналтын прокурор С.Хишигжаргал хүртэл эсэргүүцэж байв.
Гуравдугаарт, Түүний гаргасан шийдвэрийг эсэргүүцэн хохирогч, шүүгдэгчдийн өмгөөлөгчид шүүх бүрэлдэхүүнээс татгалзсан. Шүүх бүрэлдэхүүнээс татгалзсан үед шүүх бүрэлдэхүүн ямар нэгэн шийдвэр гаргах эрхгүй байдаг. Гэтэл Ч.Хосбаяр шүүгч шүүгдэгч нарыг цагдан хорих шийдвэр гаргав.
Дөрөвдүгээрт, Шүүх хурлын дараа шүүгдэгч нарын биеийн байдал муудаж, Сүхбаатар дүүргийн нэгдсэн эмнэлэгт хэвтүүлэх захирамж гарсан. Гэтэл хэдхэн хоногийн дараа цагдаагийн экс дарга нарыг цагдан хорих төв рүү ачих захирамжийг гаргав. Ингэхдээ өмнөх гаргасан захирамжаа цуцлалгүй дахин нэг захирамж гаргалаа.
Тавдугаарт, шүүгдэгч Г.Ганбаатарын хэргийг тусгаарлах шийдвэр гаргасан. Гэтэл өчигдөр болсон түүнд холбогдох шүүх хурлаар түүнийг цагдан хорих шийдвэр гаргаад, буцаад цагдаагийн экс дарга нарын хэрэгтэй нийлүүлэн хянахаар болов.
Ийнхүү түүнийг гаргасан шийдвэрээ хэд хэд сольж байгаа нь олон нийтэд захиалгаар ажиллаж байна гэх хардлагыг төрүүлээд байна.
Б.Золбоо
