Нутаг нэгт эмэгтэйчүүдээ хууран мэхлэх замаар БНХАУ-д худалдсан Г.Батдэлгэр, Г.Ганзориг, Г.Чинзориг, Н.Сэлэнгэ, Б.Бүрнээбаатар нарт холбогдох шүүх хурал Сүхбаатар дүүргийн шүүхэд боллоо.
    Нутаг нэгт эмэгтэйчүүдээ хууран мэхлэх замаар БНХАУ-д худалдсан Г.Батдэлгэр, Г.Ганзориг, Г.Чинзориг, Н.Сэлэнгэ, Б.Бүрнээбаатар нарт холбогдох шүүх хурал Сүхбаатар дүүргийн шүүхэд боллоо. Хуралд даргалагч шүүгчээр М.Алдар, ерөнхий шүүгчээр Ч.Хосбаяр, Ш.Төгсгэрэл, улсын яллагчаар Ц.Насанбат, өмгөөлөгчөөр Б.Тогоохүү, Э.Энэбиш, Л.Данзанноров, Ё.Өнөрбаяр, Г.Оюунцэцэг, С.Оюун нар оролцов.
Шүүх хуралдаан цаг гаруй үргэлжсэний эцэст тодорхойгүй хугацаагаар хойшиллоо. Учир нь шүүгдэгчид Сүхбаатар дүүргийн шүүхээр хэргээ шийдвэрлүүлэхээс татгалзсан байна. Тэдний саналыг Нийслэлийн шүүхэд хянаж үзээд хууль зүйн үндэслэлтэй бол өөр дүүргийн шүүхэд шилжүүлэх аж.
    Тэдэнд холбогдох шүүх хурал өмнө нь шүүгдэгчдийн нэг нь төрөх дөхсөн, шүүх бүрэлдэхүүнээс татгалзсан гэх мэт шалтгаанаар таван удаа хойшилж байсан юм. Гэвч тэдний шүүх бүрэлдэхүүнээс татгалзах хүсэлтийг Сүхбаатар дүүргийн ерөнхий шүүгч хүлээж аваагүй учраас ийнхүү Сүхбаатар дүүргийн шүүхээс татгалзлаа.
    Тэднийг Эрүүгийн хуулийн 124 дүгээр зүйлийн 124.2-т зааснаар биеэ үнэлэх газар байгуулсан, санхүүжүүлсэн, түүнчлэн биеэ үнэлэхэд зуучилсан, биеэ үнэлэхийг байнга зохион байгуулсан, тээврийн хэрэгсэл, орон байр, бусад зүйлсээр үйлчилсэн, мөн 113 дугаар зүйлийн 113.3-т зааснаар хүнийг хил давуулан худалдаалсан, зохион байгуулалттай бүлэг, гэмт бүлэглэл үйлдсэн гэсэн зүйл ангиар буруутгаж буй. Хэрэв гэм  буруутай нь тогтоогдвол 2-15 жил хүртэл хорих ялаар шийтгэх аж.