“Оддын эрэлд”-ээр
эхэлсэн реалити шоу үргэлжилсээр шинжлэх ухааны салбар руу орлоо. Өчигдөр гэхэд
л ерөнхийлөгчийн ивээл дор жил бүр зохион байгуулагддаг “Залуу зохион бүтээгч” реалити
шоуны шилдэг оролцогчид өөрсдийн бүтээлээр үзэсгэлэн гаргасан. Харин удахгүй “Инновацийн
эрэлд” нэртэй реалити шоу удахгүй зохиогдох гэж байна. Тус шоуны зорилго нь
Монгол хүний бүтээлч, сэтгэхүй шинэ санаа санаачилгыг дэмжих, үйлдвэрлэлийн
зориулалттай техник, технологийн шинжтэй шинэ бүтээл, инновацийн төслүүдийг зах
зээлд нэвтрүүлэх, улмаар эдийн засгийн хөгжилд бодит нэмэр хандив бий болгох юм
байна. Тухайн салбарын тодорхой нэг асуудлыг шийдвэрлэхэд чиглэгдсэн, үр дүн нь
богино хугацаанд зах зээлийн эргэлтэд орж, улс орны хөгжилд бодит хувь нэмэр
болох шинэ болон шинэчилсэн бараа бүтээгдэхүүний, техник, технологи бий
болгоход чиглэгдсэн эрдэм шинжилгээний ажил болон шинэлэг санаа агуулсан буюу
инновацийн төслүүдийг дэмжих зорилгоор 2012-2013 онд хэрэгжүүлэх төслийн сонгон
шаргаруулалтыг зарлаж байна.Инновацийн төслийг шалгаруулах үзүүлэлтүүд:
1. Бизнес төлөвлөгөө-эдийн засгийн судалгаа (эрэлт хэрэгцээ, шаардлага, үр дүн, төслийн шинэлэг дэвшилтэт тал)
2. Үр дүн, санхүүгийн тооцоо, үндэслэл бодитой эсэх
3. Оюуны өмчийн эрхийн хамгаалалт (патент, бүтээгдэхүүний болон ашигтай загвар г.м)
4. Шинжлэх ухааны тэргүүлэх чиглэл, цөм технологи, зорилтот хөтөлбөрийн жагсаалтанд хамрагдсан байдал
5. Нийгэм, эдийн засаг, шинжлэх ухааны ач холбогдол
6. Үйлдвэрлэл, туршилтын боломж нөхцөл, давуу тал
7. Төслийн боловсруулалт ба тогтвортой хэрэгжих байдал
Төслийн сонгон шалгаруулалтад оролцох хүсэлтэй эрдэм шинжилгээний байгууллага, их дээд сургууль, аж ахуйн нэгж, хувь хүмүүсийн инновацийн санааг /төслөөр/ 2012 оны 3-р сарын 12-оос 3-р сарын 30 өдрийн 17 цаг хүртэл Монголын үндэсний худалдаа аж үйлдвэрийн танхимын 305 тоотод шинжлэх ухаан, бизнесийн зөвлөл хүлээн авах юм байна.
