МУЭ-ийн танхимд чөлөөт уран бүтээлч О.Үржинханд, Л.Хонгорзул нарын хамтарсан “Нандин” үзэсгэлэн нээгджээ.  Эмэгтэй хүний гоо сайхан, баяр жаргал, уйтгар гуниг, хүсэл тэмүүлэл, эрч хүчийг тод өнгөөр дүрсэлсэн аж. Тус үзэсгэлэн энэ сарын 26 хүртэл үргэлжилнэ. Үзэсгэлэнд зураачдын 2010 оноос хойш зурсан 40 гаруй уран бүтээлийг дэлгэжээ. Энэ удаагийн үзэсгэлэнд орчин үеийн монгол зургийн өнгө төрх, утга агуулгыг бүрэн шингээсэн бүтээлүүд тавигдаж буйгаараа онцлогтой.

Зураач О.Үржинхандын бүтээлээс үр хүүхдээ хайрлан, амьдралын төлөө зүтгэж буй ээж, анхныхаа үрийг элгэндээ тэврээд мишээж байгаа эмэгтэй хүнийг уран зургийн аргаар гайхалтай дүрсэлсэн байна. Тэрбээр зургаа тойрог, дугуй дотор зурдаг. Үүнийгээ тайлбарлахдаа “Би эмэгтэй хүний амьдралыг нүдэн дотор зурдаг. Нүд үнэн чих худал, нүд сэтгэлийн толь гэж ярьдаг шүү дээ. Би гурван хүүхэдтэй. Нэг удаа хүүхдээ салхилуулаад явж байтал эргэн тойрныхон биднийг хараад өрөвдөөд байгаа юм шиг санагдсан. Тэр хүмүүсийн бодол нүднээс нь харагдаад байсан болохоор уран бүтээлээ ингэж илэрхийлэхээр болсон” хэмээн ярьсан юм. Үзэсгэлэнд тавьсан бүтээлүүдээс түүний 2010 онд зурсан “Сэтгэлийн толь” хэмээх зураг хүмүүсийн сонирхлыг татаж байсан. Харин зураач Л.Хонгорзул эмэгтэй хүний уян хатан хөдөлгөөнийг уран бүтээлийнхээ “сүнс” болгон зуржээ.