Дорнод аймгийн Халхгол сумын нутагт орших найман аюулаас гэтэлгэгч Жигважаджов Жанрайсиг бурхныг шинэчлэн сэргээн засварлах үйл ажиллагаа эхлээд байна.  Нутгийн олны саналыг аймгийн засаг дарга Ц.Жанлав Монгол улсын Засгийн газарт тавьснаар Ерөнхий сайдын 2012 оны хоёрдугаар сарын 6-ны өдөр захирамж гаргажээ. БСШУ-ны сайд Ё.Отгонбаяраар ахлуулсан улсын комисс байгуулагдаж үйл ажиллагаандаа ороод байна. Засгийн газрын комисс анхдугаар хуралдаанаа хийж, тус ажлын техник эдийн засгийн үндэслэл боловсруулах, бусад судалгааны ажлыг баталгаажуулах эрх бүхий Эрдмийн Зөвлөлийг БСШУ-ны дэд сайд Б.Ундармаагаар ахлуулан байгуулжээ. 

   Эрдмийн Зөвлөлийн бүрэлдэхүүнд МБШТ-ийн Гандантэгчинлэн хийдийн Соёлын хүрээлэнгийн захирал, доктор, гавж н.Сонинбаяр, бурхан урлаач, МУСГЗ С.Пүрэвбат, ШУА-ийн Ерөнхийлөгч Ө.Энхтүвшин, БСШУЯ-ны харьяа Соёлын Өвийн төвийн захирал С.Энхбат, Халхгол сумын Дорнод аймаг дахь нутгийн Зөвлөлийн дарга, МУГБ М.Цэвэгмид, ШУА-ийн Физик-технологийн хүрээлэнгийн эрдэмтэн, То ван судлаач Б.Палам зэрэг эрдэмтэн судлаачид орсон байна.