Таван толгойн ордоос Сайншанд хүртэл төмөр зам тавих тухай нууц гэрээг УИХ-ын гишүүн Х.Баттулга хийсэн гэж Хууль зүйн сайд Ц.Нямдорж мэдэгдсэн. Х.Баттулга гишүүнээс энэ тухай тодруулахад тэрбээр эрс үгүйсгэсэн хариу өгөв. Харин өнөөдөр ЗТБХБ-ын дэд сайд Т.Пүрэвдорж, ТЗУГ-ын дарга Бямбажав, Бодлогын газрын дарга Наранпүрэв, Гадаад харилцааны хэлтсийн дарга Нямдаваа нар мэдээлэл хийлээ. Энэ үеэр Ц.Нямдорж  болон Ч.Хүрэлбаатар сайд нарын “нууц гэрээ” гэж ярьж буй “Төмөр зам хөгжүүлэх тухай хамтарсан гэрээ”-г танилцууллаа. Энэ гэрээний тухай ЗТБХБ-ын холбогдох албаны хүмүүс огт мэдээгүй байсан гэв. Харин ЗГХЭГ-аас өгсөн үүргийн дагуу Х.Баттулга сайдын гарын үсэг зурсан гэрээг ХЗДХ-ын яамнаас албан хүсэлт тавьж авчээ. Дээрх гэрээг улсын нууцад хамаарах асуудал гэж үзсэн тул доторхи  агуулгыг бүрэн танилцуулах боломжгүй гэж яамныхан мэдэгдсэн.
   Гэрээнд Монголын талаас төрийн өмчит “Монголын төмөр зам” ХК”-ийн захирал Батзаяа гарын үсэг зурсан байна. Харин нөгөө талаас “Монголын төмөр замын дэд бүтэц” ХХК-ны захирал Улиам Ван, ахлах зөвлөх Ион Жү Ким нар гарын үсэг зуржээ. Мөн ЗТБХБ-ын сайд Х.Баттулга дээрх гэрээг баталж, гарын үсгээ зуржээ.

ЗТБХБ-ын дэд сайд Т.Пүрэвдорж: "Энэ бичиг баримт манайх дээр байхгүй байсан. Энэ гэрээнд яалт ч үгүй манай сайд байсан хүн гарын үсэг зуржээ. Хоёр жил хамт ажилласан болохоор манай сайдын гарын үсэг мөн гэдгийг мэдэж байна."

   Хамгийн ихээр сонирхол татаж байгаа нь дэд сайд Т.Пүрэвдорж “Энэ жинхэнэ гэрээ эсэхийг би хэлж чадахгүй. Эх хувь бол ингэж явахгүй гэв”. Тэрбээр сэтгүүлчдийг “Гэрээ хэзээ байгуулагдсан бэ? Улсын нууцад хамаарах материал мөн үү?” гэх зэрэг асуултад тодорхой хариулахыг хүсэхэд “би ийм мэдээлэл өгөх боломжгүй” гэж бухимдаж байв.


  Мөн тус яамны Гадаад харилцааны хэлтсийн дарга Нямдаваагийн хэлснээр тус гэрээн дээр “нууц” гэсэн тэмдэглэгээ хийсэн байгаа аж. Гэсэн ч дэд сайд Т.Пүрэвдорж энэ гэрээ нь улсын нууцад хамаарах эсэхийг мэдэхгүй гэж байхад тус яамны Гадаад харилцааны хэлтсийн дарга Нямдаваа “концессийн гэрээ” тул яах аргагүй улсын нууцад хамаарах нь тодорхой гэсэн зөрчилтэй хариултуудыг хэлж байсан юм.