Дэлхийн эмч нарын баярын өдрийг тохиолдуулан Монголын эрүүл мэндийн ажилтны үйлдвэрчний эвлэлийн холбооноос Монголын шилдэг эмч нарыг шалгаруулах “АЛТАН ЧАГНУУР” ёслол хүндэтгэлийн үйл ажиллагааг 2 дахь жилдээ уламжлал болгон зохион байгуулах гэж байна. Энэхүү “Алтан чагнуур” ёслол хүндэтгэлийн үйл ажиллагаа нь энэ оны 03-р сарын 30-ны өдрийн 14.00 цагаас Соёлын төв өргөөнд болох юм. Монголын эрүүл мэндийн ажилтны ҮЭ-ийн холбооны “Алтан чагнуур” дээд шагнал нь ард иргэдийнхээ эрүүл мэндийг хамгаалах үйлсэд эрдэм чадлаа зориулан цаг наргүй зүтгэж байдаг ард түмнийхээ дунд алтан гартай эмч гэж хүндлэгдэж байдаг эмч нараа  алдаршуулах тэдэнд ажиллах урам зориг өгсөн нэр хүндтэй шагнал юм байна.

Эрүүл мэндийн салбарыг хөгжүүлэх, хүн ардынхаа эрүүл мэндийг сахин хамгаалах үйлсэд үр бүтээлтэй ажиллаж онцгой амжилт гаргасан эмч нарын хөдөлмөрийн үнэлэмжийг дээшлүүлэх зорилгоор дэлхийн эмч нарын өдрийг тохиолдуулан Монголын эрүүл мэндийн ажилтны үйлдвэрчний эвлэлийн холбооноос “АЛТАН ЧАГНУУР” дээд шагналыг санаачлан бий болгожээ. Уг шагналд нийслэл хотын болон хөдөө орон нутгийн эрүүл мэндийн байгууллагуудаас шалгарсан 50 гаруй эмч нар нэр дэвшиж байгаа бөгөөд энэ жил нарийн мэргэжлийн төрлөөр 15 эмчийг “Алтан чагнуур” шагналын эздээр тодруулах ажээ.