АН-ын дарга Н.Алтанхуягийн зөвлөх Т.Нямдорж гэгч 2011 оны гуравдугаар сард хууль бусаар  олж авсан байрны зөвшөөрлөө шүүхийн шийдвэр гарчихаад байхад өгөхгүй гэж танхайрчээ. Байрыг хууль ёсоор эзэмших эрхтэй /нас барсан нөхөр Ш.Мөнхбатынх нь нэр дээр байсан/ өрх толгойлсон эмэгтэй Б.Аззаяа шүүхэд хандаж, шүүх түүний талд шийдвэр гаргасан ч Т.Нямдорж элдэвээр доромжлон шүүхийн шийдвэрийг биелүүлэхээс татгалзсан аж. Шүүгчдийн гаргасан захирамжийг биелүүлэхийг шаардсан өмгөөлөгч Б-г хүртэл зодож танхайрсан байна. Т.Нямдорж бол АН-ын дарга Н.Алтанхуягийн зөвлөхөөс гадна АН-ын ҮЗХ-ны гишүүн “Магнай трейд” ХХК-ий хуулийн хэлтсийн дарга аж. Өөрөө бүхэл бүтэн байгууллагын хуулийн хэлтсийн дарга байж шүүхийн шийдвэрийг үл ойшоон хэрхэн бүдүүлэг аашилж байгааг нь энэ бичлэг гэрчилнэ. Тэрбээр байрны зөвшөөрлийг буцаан өгөхийг шаардахад “Тэр цэрэг, цагдаагийн дарга хэн ч байсан хамаагүй, хэзээ ч бүтэхгүй. Хэрвээ тэд нар чинь хуцах юм бол тэд нарыг чинь ална шүү”, “Би ахиад хэлье, олон юм шалчигнаад байвал бүгдийг чинь ална шүү” гэх зэргээр дайран доромжилж байгааг нь камерт бичигджээ. Т.Нямдоржид шүүхийн шийдвэрийг үзүүлж, биелүүлэхийг хүсэхэд уурлаж ”Энийг чинь би трактораар буулгана. Шоронд орохыг нь харъя" гээд байрны ханыг чулуугаар шидсэн аж. Үгэн дундаа ч “Миний байшин биш штээ” гэж хэлж байгаа нь бичигдсэн байгаа юм. Өмгөөлөгчийг хүртэл зодож танхайрдаг түүнийг хуулийнхан шалгаж байгаа. Гэсэн ч байрны хууль ёсны эзэмшигч Б.Аззаяа АН-ын дарга Н.Алтанхуягт хандаж  “Таныг Т.Нямдорж гэгч хуульч, өмгөөлөгч нэртэй, өндөр албан тушаалтнуудад бялдуучилж, зальт үнэг мэт харагдаж хуурдаг, ядарсан над шиг эхэд хүн ёсонд баймааргүй балмад танхай үйлдэл хийж, хүч түрэмгийлэн дээрэлхэдэгийг нь баримтаар нотолж нэг талдаа таныг Т.Нямдоржийг буруу таниж, залинд нь орж ашиглагдаж, төр түмний төлөө зүтгэх үйлсээ сэвтүүлэхгүй байх, нөгөө талаар Монгол эр хүн, эхнэр хүүхдээ хайрладаг өрхийн тэргүүний хувьд надад тохиолдсон асуудлыг анхааралтай шударгаар судлан үзэж, наад Т.Нямдорждоо болж өгвөл хэлж өгч, өөрийн танил тал, нөлөөллөөрөө балмад этгээдийг хамгаалсан үйлдэл бүү хийгээрэй, түүнд битгий хуурдаж ашиглагдаасай гэж аргагүй ядарч зовж буй эх хүн, эмэгтэй хүний хувьд танаас гуйх гэсэн юм” гэж хэвлэлээр үг дайжээ. Т.Нямдоржийн танхайрч буй бичлэг интернэтэд тавигдсан тул олон хүн Н.Алтанхуягийн фэйсбүүк хуудсанд хандан чухам юу болоод байгааг асуужээ. Гэсэн ч тэрбээр үүнд ямар нэгэн хариу өгөөгүй байна. АН-ын дарга үүнд ямар хариу өгөх нь Н.Алтанхуяг, цаашлаад АН-ын нэр хүндэд багагүй нөлөөлөх бололтой.