АН-ын УИХ дахь бүлгийн гишүүн Э.Бат-Үүл, Р.Гончигдорж нар Батлан хамгаалахын сайд Ж.Энхбаярыг онц байдлын үед байлдааны зэвсэг хэрэглэнэ гэж нийгэмд айдас түрүүлсэн болчимгүй зүйл ярьсан хэмээн огцруулах хүсэлт гаргасан. Гэсэн ч УИХ-ын намрын ээлжит бус чуулганы сүүлийн өдөр МАН олонхийн хүчээр түүнийг суудалд нь авч үлдсэн билээ. Тэгвэл АН-ын гишүүд түүнийг зүгээр орхихгүй гэж шийдсэн бололтой. Үе үе бүлгийн хурлаар Ж.Энхбаярыг огцруулах тухай хэлэлцэх болсон АН-ынхны чихэнд Батлан хамгаалах яамны сайд нарын зөвлөлийн хуралд МАН-ын нарийн бичгийн дарга Я.Содбаатар суудаг гэсэн яриа дуулдах болсон байна. Үүний хажуугаар сүүлийн үед яамдын дэд сайд, төрийн нарийн бичгийн дарга нарын ажлыг МАН-ын нарийн бичгийн дарга нар цаагураа хянаж байгаа гэсэн яриа ч АН-ын гишүүдийн дунд гараад байгаа юм.  Энэ мэт асуудлаас болоод Ж.Энхбарын асуудал дахин сөхөгдөж, УИХ-ын гишүүн Р.Гончигдорж ерөнхий сайд С.Батболдод асуулга тавьжээ. Батлан хамгаалахын сайд Ж.Энхбаяр МАН-ын гишүүдэд  тараасан бичигтээ “...Харин мэргэн буучдыг тусгайлсан сургалтаар бэлтгэх ажил одоогоос жил орчмын өмнө эхэлсэн тухай надад холбогдох албан тушаалтнууд илтгэсэн болно. ЗХЖШ шийдвэр гаргаж эхний ээлжинд 2011 оны арваннэгдүгээр сард 015 дугаар анги дээр 60 хүн бэлтгэсэн бөгөөд энэ оны гуравдугаар сард дараагийн ээлжийн хүмүүсийг бэлтгэхээр АНУ-аас тусгай анги, салбарын мэргэжлийн мэргэн буучид ирэх гэж байгаа юм билээ” гэх зэргээр улсын нууцад тооцогдох баримтыг дэлгэсэн гэж үзэж байгаа аж. Тиймээс ерөнхий сайд энэ тоо баримт нь улсын нууцад хамаарах эсэх тухай хаврын чуулганаар тайлагнах хэрэгтэй болж байна. Ж.Энхбаяр сайдын суудал нэг хэсэгтээ л ганхах бололтой.