Цөмийн зэвсгийн талаар хэлэлцэх Олон улсын дээд хурал өчигдөр БНСУ-ын Сөүл хотод эхэлсэн билээ.

    Дэлхийн дахинд анхаарлыг татаад байгаа цөмийн эрчим хүч, зэвсгийн талаарх асуудал хамгийн эмзэг сэдэв болоод байгаа.

    Хуралд нийт 53 орны тэргүүн, дагалдагч 5000 мянган төлөөлөгч, 3700 сурвалжлагч, төрийн тэргүүний хувийн автомашин 44 ширхэг, тэдэнд үйлчлэх 360 автомашин,  хувийн тогооч, туслах 600 ажилтан, 18 хэлний 50 орчуулагч зэрэг 10 мянган төлөөлөгч оролцож байна.

    Төлөөлөгчдийн дунд АНУ-ын ерөнхийлөгч Барак Обама, ОХУ-ын ерөнхийлөгч Д.Медведев гээд нөлөө бүхий томоохон гүрний төрийн тэргүүнүүд байгаа.  
 
    Ази тивээс Өмнөд Солонгос, Вьетнам, Казахстан, Индонези зэрэг 10 орон оролцож байгаа.

    Харин энэхүү олон улсын хурлын албан ёсны төлөөлөгчдийн мэдээлэл дунд Монгол Улс байхгүй байсан юм. Монгол Улс энэ хуралд оролцохгүй гэсэн мэдээлэл ч мөн өчигдөр манай сайтуудаар цацагдсан.

    Гэтэл Цөмийн энергийн газрын дарга Г.Манлайжав Цөмийн зэвсгийн олон улсын дээд хуралд нууцаар оролцож байгаа гэсэн мэдээлэл ирсэн юм.
    Энэ талаар тодруулахаар Цөмийн энергийн газрын 261605 дугаар луу /Г.Манлайжавын туслахын дугаар/ залгахад Г.Манлайжав уг хуралд оролцсон гэдгийг баталсан юм. Гэвч хэзээ явсан, яагаад зэрэг асуултуудад тодорхой хариулт өгсөнгүй.

    Өнгөрсөн жил манай улсад цөмийн хаягдал булшлах талаар олон эх сурвалжийн дуулиан дэгдсэнээс хойш монголчууд энэ асуудалд ихээхэн эмзэг хандах болсон.

  Г.Манлайжав Цөмийн дээд хэмжээний олон улсын хуралд нууцаар оролцсон нь энэ асуудалтай холбогдож “Нээрээ Монголд цөмийн хаягдал булшлах гэж байгаа юм биш үү” гэсэн хардлагыг улам төрүүлж байна.

Олон улсын ажиглагчид манай улсыг “цөмийн зэвсэггүй” статустай орны хувьд төдийлөн энэ асуудалд оролцох сонирхолгүй байгаа байх гэж бичсэн байсан юм.  

Албан ёсны мэдээлэлд Г.Манлайжав байхгүй байгаа ч өөрөө оролцсон нь хачирхалтай байна. Олон улсын цөмийн хурал өнөөдөр дуусч байгаа юм.