Их сунгаа гэгч нь ойртсон энэ үед улс төрийн хүрээнийхний хэдэн бие рүүгээ дайрсан эрээвэр хураавар шар мэдээллүүд дундаас үнэнийг олоход бэрхтэй болжээ. Ямартай ч Авлигатай тэмцэх газрын дэд дарга Б.Хурц тус албанд хэл амтайхан томилогдохдоо МАН-ын нэр бүхий гишүүдэд “Танай намаас таван хүнийг шоронд хийчихсэн байхад та нарыг сонгуульд ялахыг харнаа” гэж агсам тавьсан талаар хэвлэлүүд нэг хэсэгтээ шуугисан. Гэтэл сүүлийн үед өрнөөд буй үйл явдлаас харахад шаравтар гэмээр энэ мэдээлэл оргүй хоосон биш байсан бололтой. Тэр ч бүү хэл есөн аймаг, гурван дүүргийн Засаг дарга нарыг шүүхийн хаалга татуулах үүрэг хүлээсэн талаар эл хүрээнийхэн шивэр авир хийж байсан нь эхнээсээ биелэлээ олж эхэллээ.

   Тэгэхээр одоогийн байдлаар тус газарт уригдаад буй Засаг ноёдын улс төрийн угшилыг хөөвөөс ихэнх нь МАН талдаа юм гээч. Энэ бүгдээс ажихад энд ямар нэгэн гаргалгаа байгааг харж болохоор байна. Тус газрын дэд даргын томилгоо эхнээсээ л учир битүүлэг, жигтэй гэмээр үйл явдлаар өрнүүн байсан. Нэгэн цагт гэмтэн болж явсан Б.Хурцад ардчилсан Ерөнхийлөгч гэнэт л хайр зарлан хаа байсан Англиас авчран энэхүү албан тушаалд томилсон түүхтэй. Харин тэрбээр тус албанд тухалсан даруйдаа Авлигатай тэмцэх газрыг жинхэнэ утгаар нь тонгочуулж, иргэдийг цочирдуулж байсан нь саяхан. Одоо ч халаа сэлгээнд өртсөн гэх ажилтнуудын цуваа Төрийн албаны зөвлөлөөс салаагүй л байна. Ямартай ч үнэнч шударгаар ажиллаж буй хэнийг ч болов хэлмэгдүүлэхгүй хэмээн төрийн өмнө амлалт өгсөн эрхмүүд хэлсэн үгнээсээ буцаж, өөрт таалагдахгүй нэгнээс нь авахуулаад өө сэвгүйг нь ч халсан гэх.

   Ийнхүү шинэ дарга нартай холбоотой бараан мэдээллүүд хэвлэлийн хуудаснаа цагийн зүү шиг эргэлдсээр байна. Харин сонгууль дөхсөн энэ үед нам хар болон талцах манай нийгмийн бичигдээгүй хуулийн зүйл заалт ч мэр сэр тус газарт үйлчилдэг бололтой юм. МАН-ын хэдэн Засаг ноён эхнээсээ ХХI зууны их хэлмэгдүүлэлтэд өртөж, үгээ хэлж эхлэв. Ямар сайндаа л Говьсүмбэр аймгийн Засаг дарга Ж.Баянмөнх үүрэгт ажлаа өгч байгаад, үнэн мөнөө олж ардчилсан нийгмийн хөрсөнд байж боломгүй энэ аймшигтай хэлмэгдүүлэлтийн эсрэг тэмцэнэ хэмээн ярьж явахав. Ер нь тэгээд энэ шуурганд өртөхгүй үлдэх ууган хүчний Засаг ноён торойх юм болов уу даа. Өвөрхангай, Увс, Говьсүмбэр, Орхон, Налайх  гээд тоочоод байвал нэлээд л урт дараалал үүсч мэдэх нь. Хамгийн сүүлийн үеийн мэдээллээр гэхэд л, хэлмэгдүүлэлтийн энэ шуурганд Говь-Алтай аймгийн Засаг дарга Ш.Амгаланбаяр өртлөө. Түүнийг албан тушаал, эрх мэдлээ хэтрүүлэн тендергүйгээр бараа, ажил үйлчилгээ худалдан авч, танил талын компанид давуу эрх олгосон гэжээ. Ийнхүү Авлигатай тэмцэх газрын “мөрдөн байцаагч”-ид бөөн бөөнөөрөө тус аймгийн Алтай суманд ажилласан юм байх.

   Ямартай ч шинэ үеийн хэлмэгдүүлэлтэд өртөх хувь тавилан нь сонгуультай зэрэгцэн зурагдсан  Засаг дарга нарын дөрөв нь тодорхой боллоо. Одоо цаана нь тав үлдсэн гэж байгаа. Харин “баривчилгаа” ирэх сарын 15-н хүртэл үргэлжлэх талаар учир мэдэх нэгэн нь халаглаж сууна. Тиймдээ ч өнгөрсөнд АН-ынхан Орон нутгийн сонгуулийн хуулийг өөрсдийн үзэмжээр хав дарж, энэ шатны сонгуульд ялалт байгуулахын тулд ууган хүчний хэдэн Засаг даргыг Б.Хурцад даатгасан бололтой дэг шүү.

   Эцэст нь хэлэхэд, төсвөөс өндөр өртөгтэй ажилладаг хэрнээ авлигын том хэрэг илрүүлж, сүйд болчихоогүй ийм газар ер нь байлаа гээд ямар үр дүн гарч байна вэ. Өнгөрсөн хугацаанд толгой тархитайгаа зууралдаж сууснаас авлигын ийм том хэрэг илрүүлж, энэ их хэмжээний хохирлыг барагдуулсан гээд бардам дэлгэх тоо баримт энэ газарт байна уу. Акул биш жараахайн араас хөөцөлдсөн Авлигатай тэмцэх газраас ажлын үр дүн шаардах цаг хэдийнэ өнгөрчихөөд байна. Байгуулагдаад тав, зургаан жил болсон хэрнээ өнөө хэр улс төрөөс хараат бус үйл ажиллагаа нь жигдрээгүй, үргэлж хэл ам таталж, шүүмжлэлийн бай болдог, хэрэг илрүүлэхээсээ илүү зарим улстөрчийн нэгнээ шантаажлах хэрэгсэл мэт ойлголт төрүүлсэн байгууллага авлигатай тэмцэх биш өөгшүүлэх ажилд гар бие оролцоод байгаа юм биш үү.