Өнгөрсөн амралтын өдрөөр гэмт хэргийн гаралт хэр байсан талаар ЦЕГ-ын Хэвлэл мэдээллийн төвийн ажилтан, цагдаагийн дэслэгч Б.Саруултуяатай ярилцлаа.
    Өнгөрсөн амралтын өдрөөр гэмт хэргийн гаралт хэр байсан талаар ЦЕГ-ын Хэвлэл мэдээллийн төвийн ажилтан, цагдаагийн дэслэгч Б.Саруултуяатай ярилцлаа.

-Өнгөрсөн амралтын өдрөөр гэмт хэргийн гаралт хэр байв?

-Өмнөх амралтын өдрийг бодвол энэ амралтын өдрөөр гэмт хэргийн гаралт харьцангуй бага байлаа. Гэхдээ хүний амь насыг санаатайгаар хохироосон хоёр хэрэг бүртгэгдэн мөрдөн шалгагдаж байна.

-Тодруулбал?

-Налайх дүүргийн гуравдугаар хорооны нутаг дэвсгэрт эхнэр нөхөр хоорондоо маргалдсаны улмаас нөхөр болох 26 настай Н хоёр сартай хүүхдээ шидэж амь насыг нь хохироосон. Цагдаагийн алба хаагчид гэмт этгээдийг цагдан хорьж, хэргийг үргэлжлүүлэн мөрдөн шалгаж байна. Мөн Сүхбаатар дүүргийн 21 дүгээр хорооны нутаг дэвсгэрт Рашаантын өртөөний далангийн хойд талд хүзүү, баруун дал орчмоо дөрвөн удаа мэсээр хутгалуулан нас барсан хүний цогцос олдсон. Хохирогч нь Төв аймгийн Аргалант сумын 32 настай Д болохыг тогтоосон. Одоо гэмт этгээдийг эрэн сурвалжилж байна. Ер нь хүний амь насыг санаатайгаар хохироосон хэргүүд гол төлөв ахуйн хүрээнд архидан согтуурсны улмаас хамаатан садан, найз нөхөд, эхнэр нөхрийн дунд, цаашилбал ээж нь хүүгээ хөнөөх, хүүхэд нь ээжийнхээ амь насыг хохироож байгаа юм. Тиймээс ахуйн хүрээнд архидан согтуурах явдлыг иргэд таслан зогсоох шаардлагатайг цагдаагийн байгууллагаас анхааруулж байна.

-Золгүй байдлаар амь насаа алдсан тохиолдол бүртгэгдсэн үү?

-Золгүй байдлаар амь насаа алдсан долоон тохиолдол гарсан байгаа. Дийлэнх нь архи хэтрүүлэн хэрэглэсний улмаас архи уусан байдалтайгаар амь нас нь хохирсон байдалтай байна. Мөн санамсар болгоомжгүйгээр амь насаа алдсан тохиолдлууд цөөнгүй байна. Тухайлбал, Төв аймгийн Алтанбулаг сумын нутаг дэвсгэрт Тавантолгой цэргийн ангийн палёгонд 24 настай Б хуучин төмөр цуглуулж яваад танк сөнөөгчийн сум олж газар цохиж байгаад дэлбэрч, улмаар цус алдсан байдалтайгаар амь нас нь хохирсон байгаа.

-Өнгөрсөн бямба гаригт газ дэлбэрсэн хэрэг гарсан гэсэн?

-Тэсэрч дэлбэрэх бодистой буруу харьцсанаас эд хөрөнгө, эрүүл мэндээрээ хохирсон хоёр ч тохиолдол бүртгэгдсэн. Тухайлбал, Сүхбаатар дүүргийн наймдугаар хорооны нутаг дэвсгэрт усан бассейны баруун талын таван давхарт оршин суух 45 настай А нь сантехникийн хоолойн наалтын засах зорилгоор газыг асаасан байгаа. Улмаар газ нь дэлбэрч, өмч хөрөнгөөөрөө хохирсон хэрэг гарсан.