УИХ-ын гишүүн Х.Баттулга өнөөдөр нууц гэрээ хэмээн яригдаад буй солонгосчуудтай байгуулсан гэрээний талаар мэдээлэл хийлээ. Тэрбээр хамгийн түрүүнд энэ гэрээг нууц биш гэдгийг хэлээд өнгөрсөн онд Засгийн газарт хэд хэдэн удаа танилцуулсан гэв. Тухайлбал, хоёрдугаар сарын 23, гуравдугаар сарын 9, дөрөвдүгээр сарын 6, зургадугаар сарын 8, 22-ны өдөр танилцуулсан гэх мэдээлэл интернэт сайтад ч нээлттэй байгаа гэжээ. Ийнхүү дэлгэхдээ нөгөө талаас гэрээ бүхэнд тодорхой нууцлал байдаг гэсэн юм. Түүнээс биш Засгийн газраас нууцалж, УИХ-аас далдуур мөнгө аваад гэрээ байгуулчихсан юм байхгүй гэж тайлбарлав. Мөн тэрбээр “Манай улс далайд гарцгүй учраас төмөр замын ямар ч асуудал нууц байх ёстой” хэмээн онцоллоо.