Сүүлийн үед самар хууль бусаар хил давуулан гаргах явдал ихэслээ. Хамгийн сүүлд БНХАУ руу 27 вагон хуш модны цайруулсан самрыг удаа дараагийн үйлдлээр гаргасан хэргийг УМБГ, Прокурорын дэргэдэх мөрдөн байцаах алба шалгаж байна. Монголд нэг кг самар дунджаар 2 000 төгрөгийн үнэтэй. Тэгэхээр Монголын ханшаар нэг вагон самар 120 сая төгрөг, 27 вагон самар 3.2 тэрбум төгрөг болж байгаа юм. Хэдийгээр энэ мөнгө бага биш боловч БНХАУ дах самрын ханшны дэргэд бага. Монголоос 3.2 тэрбум төгрөгөөр авсан 27 вагон самар Хятадын хилээр ороод 455 тэрбум төгрөг болж байна. Тэгэхээр Монголын гааль, цагдаагийнхан 455 тэрбум төгрөгийг үнэ бүхий хуш модны самрыг БНХАУ-ын хил дамжуулан алдчихаад сууж байна. Энэ хэрэгт Говьсүмбэр аймгийн Чойр дахь гаалийн салбарын эрхлэгч Б.Лхагвадорж, байцаагч Отгонбилэг, Ч.Уранчимэг, Замын-Үүдийн гаалийн байцаагч Эрдэнэбаатар, Өлзий-Аюуш нарыг хорьж шалгаж байгаа. Мөн Замын-Үүдийн гаалийн байцаагч Б.Жаргалсайханыг гадуур шалгаж байна. Байцаагч нар уг 27 вагон самрыг гурван хэсэгт хувааж хил дамнуулсан байна. Эхний арван вагон самрыг өнгөрсөн оны 12 дугаар сард хил давуулсан бол дараагийн 17 вагон самрыг хоёр хэсэг хувааж, арван вагон, долоон вагон болгон сар шинийн өмнө гаргасан аж. Ингэхдээ нэг вагонд ачсан самар тус бүрийг 25 кг-аар савласан байжээ.
Хэргийг маш нарийн зохион байгуулсан нь улс төрийн зохион байгуулалттай байсан гэх хардлагыг олон нийтэд төрүүлээд байгаа юм. Мөн хэргийн ард МАН-ын нөлөө бүхий дарга нар байгаа гэсэн яриа чих дэлсэх болсон. Хэрэв уг таамаг үнэн бол МАН-ын нөлөө бүхий эрхмүүд гуравхан сарын дотор 27 вагон самраар 455 тэрбум төгрөг босгосон бололтой. Гэвч 455 тэрбум төгрөгөөс улсын төсөвт нэг ч төгрөг ороогүй гэнэ.
Хэдэн жилийн өмнө “Женко” Х.Баттулга 17 чингэлэг спирт Монголын хилээр оруулж байв. Гэтэл өдгөө тэрбээр архины бизнес хийдэг хүмүүстэй “дайн” зарлаж архи үйлдвэрлэдэг компаний захирлуудыг УИХ-д нэр дэвшүүлэхгүй байхыг уриалаад байгаа. Хэрвээ тийм уриалга гаргаж байгаа бол архины наймаа эрхэлж, 17 чингэлэг спирт оруулж ирсэн хүнийг ч гэсэн нэр дэвшүүлэхгүй баймаар. Энэ мэтчилэн хууль бус барааг чингэлэг, чингэлэгээр оруулж ирж байгаагийн цаад эзэд нь тогтоогдохгүй, тогтоогдсон ч “хөл хуурай” гарсаар байна.
Дээрх 27 вагон самрын хэргийн цаана МАН байгаа гэх боловч жинхэнэ эзэн ньхэзээ ч илрэхгүй биз гэх хүн олон байна. Хэрвээ хэргийн эзэн олдвол жинхэнэ дуулиан болох биз ээ.
