Үндэсний соёл амралтын хүрээлэнг “Дисней лэнд” шиг болгоно гэсэн сайхан амлалтаар газрыг нь төмөр хашаагаар хашаад удаж байна. “Бодь групп” Монголыг “Дисней лэнд”-тэй болгоно гэж ам гарснаас хойш борчуудын хүүхэд тоглож хүч хүрэхээргүй үнэтэй, цөөн хэдэн тоглоомтой болсон. Харин энэ зуур Үндэсний соёл амралтын хүрээлэнгийн хашааг тойрон тансаг зэрэглэлийн барилгууд сүндэрлэсээр байна. “MCS” группын барьж буй “Шангрила” зочид буудлыг хүүхдийн тоглоомын газраас хумсаллаа гэж хэл ул болж байх хойгуур Монголд алт олборлолтоороо тэргүүлдэг, “МАК”-ын цамхаг сүндэрлэхэд бэлэн болж, аль хэдийн зураг төсөл нь гарчээ.
 
  “Бодь групп”-ынхэн Нийгмийн хамгаалал, хөдөлмөрийн дэд сайд Н.Номтойбаярын өв залгамжилсан “МАК”-д хэл ам болж байж авсан газраа зарсан уу, зээлсэн үү, хэдэн төгрөгөөр наймаалцсан бэ гэдэг нь одоогоор ил болоогүй байна. Гэхдээ “МАК” “Hyatt” зочид буудлынхаа шавыг тавихаар өрөмдлөг хийж эхлээд байна. “МАК” компани дэлхийд алдартай таван одтой “Hyatt” зочид буудлын салбарыг Монголд барих гэж байгаа нь энэ юм. Дөч гаруй давхар шилэн барилгыг “MCS” компаний “Шангрила”-гаас илүү барих гэж багагүй хүч, хөдөлмөр зарцуулсан бололтой. “Hyatt” групп нь АНУ-аас гаралтай бөгөөд 2012 оны нэгдүгээр сарын нэгний байдлаар дэлхий даяар 483 салбар зочид буудалтай юм.

   Монголд дэлхийд алдартай, нэр хүндтэй зочид буудал байгуулах гэж байгаа нь сайн хэрэг боловч заавал хүүхэд, залуучуудын чөлөөт цагаа өнгөрөөдөг ганц паркийн газрыг өмчлөх хэрэг байна уу, үгүй юу. Баригдсан хойноо “MCS” шиг хүүхдийн тоглоомын талбай булаалаа гэж тавлагдах хэрэг байна уу, үгүй юу. Нэгэнт “МАК”-ын өв залгамжлагч Н.Номтойбаяр улс төрд хөл дүрсэн болохоор эхнээсээ өрсөлдөгчдийнхөө аманд орохооргүй үйлдэл хийвэл сайн сан.

   “МАК” бол улс төрийн нөлөөлөлтэй ч бай, нөлөөгүй ч бай уул, уурхайн салбарт тун амжилттай яваа компани. Эзэмшилд нь:
- Дорнод аймагт орших Адуунчулууны уурхай /290 тонн хүрэн нүүрсний нөөцтэй/.
- Улаанбаатар хотоос 560 км зайд, Дорноговь аймгийн нутагт орших Цагаан суваргын ил уурхай /250 сая хүдрийн нөөцтэй/.
- Элдэв, Хөөтийн нүүрсний уурхайн /30 сая тонн нөөцтэй/. Уг уурхайг түшиглэсэн хагас коксын үйлдвэр байгуулсан /жилд 75,000 тонн хагас коксон түлш үйлдвэрлэх хүчин чадалтай/.
- Нарийн сухайтын чулуун нүүрсний орд /229 сая тонн нөөцтэй/
- Цагаан суварга зэс молибдений ил уурхай /250 сая тонн зэсийн нөөцтэй/ байдаг. Удахгүй Монголын анхны цементийн үйлдвэрийг барина хэмээн төлөвлөөд байгаа юм.