Монголын шуугиантай асуудлыг шийдэх “ирээдүйн хариултын нэгэн хувилбар” Ирландад түрүүлж гарлаа.

Манай оронд болсон үйл явдал дэлхийн нөгөө бөөрөнд орших Ирландад бараг ижил цаг хугацаанд болж байна.
 
    Монголд Ерөнхий сайд С.Батболд, сайд Ц.Нямдорж, сайд Д.Зоригт, ЗГХЭГ-ын дарга Ч.Хүрэлбаатар нарыг АТГ-т өгөн шалгуулж байгаа билээ.

    Тэгвэл Ирландад Ерөнхий сайд асан, сайд болон парламентын гишүүдээ АТГ-т өгсөн байна.

Тус улсын Ерөнхий сайд асан Берти Ахерн болон яамны сайдууд ихээхэн хэмжээний авилга авсан нь нотлогдсон нь Ирландын нийгмийг “донсолтол” шуугиан тарьж байна.

    Үл хөдлөх хөрөнгийн бизнес эрхлэгч Том Гилмартин, Овен О Каллагхан нар Берти Ахерн тэдэнд 1989 онд 50 мянга, 1992 онд 30 мянган ирланд пунт өгснийг гайхуулан ярьсан байна. Энэ үед Ахерн сангийн сайд байжээ. Уг сэжүүрээс үүдэн шүүгч Ален Махонаар удирдуулсан гурван шүүгч Ахерны санхүүгийн байдлыг судалсны эцэст авлигын хэрэг үйлдсэнийг тогтоосон байна.

    Берти Ахерн 1990 онд Сангийн сайд байхдаа баян хандивлагчдаас “Файна файл” намд хандивласан /1993-1995 оны хооронд/ 275 мянган ирланд пунтыг нуун дарагдуулсан байжээ. Ахерн  хандивын мөнгийг 1992-1994 оны хооронд гэр болон ажлын өрөөний сейфдээ хадгалж байснаа хүлээн зөвшөөрч, үүнийгээ татвараас зайлсхийх зорилготой байсан хэмээн өөрийгөө өмгөөлсөн нь түүнийг татварын хууль зөрчсөн давхар хэрэгт унагажээ.  

    Ахернаас гадна “Файна файл” намын гишүүн, сайд асан Падрайг Флинн намын хандивийн мөнгөнөөс ферм худалдан авах гэж байсан нь илэрсэн байна. Мөн тус намын өөр нэгэн зүтгэгч Лиам Лаулор авилга авснаа хүлээн зөвшөөрсөн байна.
Шүүгчид эрх баригчдын санхүүгийн зөрчлийг батлах 3211 хуудастай мэдээллийг  Цагдаагийн газар, Татварын байгууллага, Улсын прокурор нарт явуулсан байна. Тиймээс эрх баригчид удахгүй “Татвараас зайлсан, авлига авсан, хуулийг санаатайгаар зөрчсөн” гэх үндэслэлээр ял эдлэхээр болжээ.

    Харин Монголын АТГ хэдэн өдрийн турш авлига авсан хэмээн яригдаж буй Ерөнхий сайд  болон бусад сайд, дарга нарыг авлига авсан хэмээн баталж чадах болов уу?

    Ирландын шүүгчид авлигын хэргийг илрүүлэхийн тулд 600 гаруй гэрчээс мэдүүлэг авсан байна. Монголын АТГ хэрхэн шалгах бол?

    Авлига авсан нь батлагдмагц “Файна файл” намын олон гишүүн Намын дарга Михайл Мартиныг “авлигалын эзэн” Берти Ахерныг намаасаа хөөхийг шаардсан байна. Берти Ахерн шаардлагыг хүлээн авч намаасаа гарснаа өнгөрсөн Пүрэв гаригт мэдээлжээ.
    Хэрвээ Монголын эрх баригчид авлига авсан нь нотлогдвол албан тушаалаа өгөх болов уу?

Дэлхийн улс төрийн үйл явдлууд “адилхан” байдаг нь үнэхээр хачирхалтай юм. Дэлхий ер нь яаж л эргээд байна даа хүмүүс ээ?