Өнгөрсөн долоо хоногт МАН-ын Ёс зүйн хорооноос зарим гишүүддээ намын бодлогоос зөрсөн зүйл хэвлэлээр ярилаа гэж сануулга өгсөн. Тодруулбал, УИХ-ын гишүүн Д.Тэрбишдагва, Д.Балдан-Очир, Р.Раш нарыг намаа шүүмжилж ярьж яваагаа тайлбарлахыг шаардсан. Тэгвэл Д.Тэрбишдагва гишүүн намын Ёс зүйн хороондоо хариу бичиг явуулжээ. Тэрбээр “Монгол Ардын Намаа МАН+АН болгож будлиантуулахад хүргэсэн намын дарга, удирдлагаа шүүмжилснийхээ төлөө хатуу анхааруулга авч байгаа юм байна” гэжээ. Д.Тэрбишдагва өөрт нь сануулга бичиг өгсөнд тун сэтгэл дундуур байгаа тул намын удирдлагуудаасаа уучлалт гуйх биш харин ч илүү хурц шүүмжилжээ.

... Ер нь МАХН /одоогийн МАН/-ын удирдлагын арга барилд сүүлийн үед бий болсон, одоо ч амь бөхтэй оршиж буй дутагдал гэвэл:
-    Үнэн үг хэлсэн гишүүдээ адалж, элдэв нэр, хоч өгч, ил далд тооцоо хийж, тэднээсээ хөндий байна. МАН-ын удирдлага үзэл бодлын зөрүүтэй “журмын нөхөд”-өө хэвлэл мэдээллийн хэрэгсэл болон төрийн эрх мэдлээр далайлган дарамтлах ажиллагааг маш их явуулж байна.
-     Удирдлагын хэдхэн хүн улам тасарч, өөрсдөө “найдвартай хүмүүс"-ийн бүлэглэл үүсгэн гишүүд, дэмжигчид нь уулзах, үгээ хэлэхэд саадтай болж, ойр дотны хэдхэн хүн намын дотоод амьдралын амин чухал асуудлыг шийдвэрлэж байна.
-    Намын нийтлэг эрх ашиг гэхээсээ ашиг сонирхлын бүлэглэлд үйлчилж, улс төрийн өрсөлдөгч нам, хүчинтэй хэт ойртож, олон зүйл дээр санал санаачилга алдаж байна.
-    МАН ийм  сулбагар, идэвхигүй байгаа нь УИХ-ын сонгуулт хаяанд ирсэн энэ үед нам “хүнд цохилт” хүлээх магадлал улам өндөр болж байгаад санаа зовохгүй байж чадахгүй байгаа” гэсэн байна.
   Харин надад намын Ёс зүйн хорооноос сануулга болгосон шиг намын нэр хүнд, эв нэгдэл, намын эрх ашигт сөргөөр нөлөөлөх үйлдэл” санаа зорилго байхгүй. Харин Үг хэлэх, үзэл бодлоо чөлөөтэй илэрхийлэх эрхээ МАН-ын ёс зүйн хорооны дарга болон бусад удирдлагаар хасуулахгүй гэж” хатуухан хэлжээ. Хэрэв МАН-ын дотор Д.Тэрбишдагва гишүүний шүүмжилсэн дутагдал нь бодитой байгаа бол түүнд намаас сонгуулийн тойрог хувааарилахдаа нэлээн гэдийх магадлалтай болоод байна. Ямартаа ч МАН-ын дотоодод байн байн яригдах болсон хагаралдааны шинж тэмдэг Д.Тэрбишдагва гишүүний үгээр улам тод илэрч байна.