МУГЖ, дуучин Самандын Жавхлан энэ оны сонгуульд нэр дэвших гэж байгаагаа албан ёсоор мэдэгдлээ. Тэрбээр “Би өнгөрсөн гурван жилийн хугацаанд бүх сэтгүүлчид нэр дэвшихгүй гэж хэлж ирсэн. Гэхдээ худал үгийг 1000 давтвал үнэн болдог гэдэг үлгэрээр та нарын өмнө би нэр дэвших нь үнэн болоод сууж байна” гэлээ. Мөн тэрбээр энэхүү мэдэгдлийнхээ хажуугаар “Дээлтэй сонгууль 2012” гэсэн уриалгыг дэвшүүлсэн юм. Уг уриалга нь түүний үндсэн мөрийн хөтөлбөр байх бололтой. Одоогоор аль тойрог, аймагт нэр дэвшихээ сонгоогүй байгаа ч гэлээ УИХ-д харийн хувцас өмсөөд сууж байгаа, харь оронд бүх юмаа зөөдөг гишүүдийг бүгдийг нь дээлтэй болгох нь нэр дэвшиж буйн гол зорилго гэсэн юм. Мөн тэрбээр мэдээллийнхээ төгсгөлд “Энэ гишүүд дандаа худлаа ярьдаг байсан. Хөдөө иргэдтэй уулзахаар очихдоо сайхан дээл өмсчихөөд эргээд хотод ирэхээрээ гадаад хувцас өмсдөг. Энэ нь тэд анхнаасаа л хуурч байсан хэрэг” гэж хэлэв.