Дуучин С.Жавхлан энэ жилийн сонгуульд нэр дэвшихдээ "Дээлтэй сонгууль" хэмээх уриалга гаргасан юм. Тэрбээр "Эдийн засагч, хуульч гэсэн хоосон мэргэжил нөмөрсөн хүмүүсийг бүү сонго. Харин хүн чанар, монгол сэтгэл, дээлээ өмссөн хүнийг сонго" гэж байлаа. Энэ үгээрээ сонгуульд нэр дэвших хүмүүсийг болон сонгогчдыг ч дээлтэй байхыг уриалсан юм. Мөн "Бид дэлгэсэн тэрлэг шиг Монгол гэж ярьдаг, дуулдаг. Гэхдээ одоо хэрэгжүүлдэг болмоор байна. Би эх орноо нөмрөх гэтэл харийнханд лиценз нэрээр худалдаж, дээлийг нь сэмэлсэн байна. Бид сэмэрсэн дээл өмсдөггүй байж, эх орноо сэмлүүлж цоолуулжээ. Шагнал авахдаа хүртэл би дээлийнхээ энгэрийг цоолуулмааргүй байна гэсэн. Хүмүүс намайг шоолж байсан" гэлээ. Түүний уриалгыг хүргэе.
