МоАХ-ны тэргүүн Х.Баттулгыг ЗТБХБ-ын сайдаар ажиллаж байх үед нь “Монголын төмөр зам” ТӨХК-ны захирлаар томилогдсон Б.Батзаяаг Засгийн газар “араандаа зуужээ”. Хонконгд бүртгэлтэй Солонгос, Хятадын хамтарсан “Монголын төмөр замын дэд бүтэц” ХХК-тай Засгийн газарт мэдэгдэлгүй нууцаар гэрээ хийсэн гэж түүнийг буруутгаад байгаа. Х.Баттулга гишүүн өөрт оногдсон бүрэн эрхийнхээ дагуу дээрх гэрээг байгуулсан гэж байгаа ч Засгийн газар түүнд өчигдөр сануулга өгч “Засгийн газрын хуралдаанаар огт хэлэлцэгдэж байгаагүй тул олон нийтэд ташаа мэдээлэл тараах нь хариуцлага хүлээдэг” гэдгийг хатуу сануулсан.

   Харин дараагийн сануулга болгож гэрээнд гар бие оролцсон Б.Батзаяаг суудлаас нь огцруулахаар ярьж байгаа аж. Х.Баттулга гишүүний бие хамгаалагч байсан гэдэг нь нэгэнт тодорхой болсон тэрбээр 2011 оны нэгдүгээр сард ажлаа хүлээж авахдаа Засгийн газраас “Шинэ төмөр зам” төслийг гүйцэтгэх үүрэг авсан. “Шинэ төмөр зам” төслийн хүрээнд Тавантолгой-Цагаан суварга-Сайншанд-Баруун-Урт-Хөөт-Чойбалсан, Хөөт-Нөмрөг, Ухаахудаг-Гашуунсухайт, Нарийсухайт-Шивээхүрэн чиглэлд төмөр зам тавихаар зарим ажлуудаа хийгээд эхэлчихсэн байгаа юм. Гэтэл өчигдөр үдээс хойш Засгийн газар хуралдаж “Үндэсний төмөр замын суурь бүтэц” гэх 51-ээс доошгүй хувь нь төрийн өмчит байх шинэ компани байгуулахаар шийдэв. Энэ нь статус, үүргийн хувьд Б.Батзаяагийн толгойлж буй “Монголын төмөр зам” ТӨХК-тай адил юм. Мөн л 2011 оны эхээр батлагдсан “Шинэ төмөр зам” төслийг хэрэгжүүлэх үүрэгтэй. Үндсэндээ Б.Батзаяа ба “Монголын төмөр зам” ТӨХК төрд хэрэггүй болж байгаа юм. Засгийн газрын сайд нарыг АТГ-т өгч “онгироод” байгаа Х.Баттулгын баруун гарыг хүчгүй болгох арга нь энэ байж мэдэх юм. Нэгэнт эрх мэдэл, хийх ажил нь өөр байгууллагад шилжвэл Б.Батзаяа ч огцрох нь бодитой болж байна. Үүнээс гадна түүнийг нууцаар гэрээ хийж, хууль зөрчсөн гэж эрүүгийн хэрэгт ч татах магадлалтай болоод байгаа гэж Төрийн ордон доторхи эх сурвалжууд мэдээлж байна.

    Ерөнхий сайд С.Батболд удахгүй “мэндлэх” “Үндэсний төмөр замын суурь бүтэц” компаний танилцуулгыг сонсоод ““Төмөр замын талаар төрөөс баримтлах бодлого”-ын хүрээнд хийгдэх ажлууд  ийнхүү ил тод, нээлттэй, хууль ёс дагуу Засгийн газрын хуралдаанд танилцуулагдаж байна. Түүнээс бус далд хэлбэрээр хийгдсэн ямар нэгэн гэрээ хэлцэл Засгийн газрын түвшинд яригдах ёсгүй" гэв. Цаагуураа Х.Баттулгыг хэлээд байгаа хэрэг.

    Уг нь “Женко” Х.Баттулга , Б.Батзаяа нар гар хоосон, хөл хөсөр суугаагүй аж. “Монголын төмөр зам” ТӨХК байгуулагдсан цагаасаа хойш төмөр зам барих ажлыг бага ч гэсэн урагшлуулж байжээ. Бас ч гэж хөрөнгө мөнгө цацсан бололтой. ЗТБХБ-ын шинэ сайд Ц.Дашдоржийн “бүтээсэн” “Үндэсний төмөр замын суурь бүтэц” компани лав тэдний ажлыг үргэлжлүүлэхгүй. Учир нь Засгийн газрын нөөц сангаас 518 сая төгрөг, Хөгжлийн банкаас 399 тэрбум төгрөг гаргахаар болсон. 49 хувийг нь ч хөрөнгө оруулагч нарт өгч шив шинэхэн ажил эхлүүлэхээр болжээ. Б.Батзаяа захирал “Засгийн газар мөнгө, хөрөнгө гаргаж өгөхгүй байна” хэмээн гомдолж байсан бол хүсэл байвал хэдхэн өдрийн дотор тэрбум, тэрбумаараа орж ирж болдог гэдгийг хаалганы цаанаас хараад сууж байна. Даргын суудал ч яахав дахиад олдоно. Харин бүтэн жилийн хугацаанд хийсэн ажил, үрэгдсэн төсвийн мөнгө хайран байна.

Татан буугдах нигууртай болсон “Монголын төмөр зам” ТӨХК-ны хийсэн ажлууд:

2010.11.03    Төслийн эхний үе шат болох Даланзадгад-Чойбалсан хүртэлх 1100 орчим км төмөр замын суурь бүтцийг барих тусгай зөвшөөрлийг “Монголын Төмөр Зам” ТӨХК-д Засгийн Газрын 283 тоот тогтоолоор олгов.
2010 он            Улсын төсөвт 975,454.90 мянган төгрөг төвлөрүүлэв.
2011.02            ОХУ-д үйлдвэрлэсэн 3000 морины хүчин чадалтай 2ТЭ-116 серийн 2 илчит тэргийг УБТЗ ХНН-т түрээсээр ашиглуулж эхлэв.
2011.04.07    “Шинэ төмөр зам төсөл”-ийн Техник Эдийн Засгийн Үндэслэлийг боловсруулахаар “МакКинсей энд Компани”-аар ахлуулсан Либерти партнерс, Пиллсбүри винтроп шаув питтман болон БНП Парибас нараас бүрдсэн зөвлөх багтай “Зөвлөх үйлчилгээний гэрээ” байгуулав.
2011.04.22       Дорноговь аймгийн Сайншанд сумын Хар Тойром хэмээх газар хөрс хуулалт, газар шорооны ажлыг эхлүүлэх шав тавих ёслол болов.
2011.07.04      “Шинэ төмөр замын төсөл”-ийн төмөр замын техникийн зураг төсөл боловсруулах компанийг сонгон шалгаруулах хязгаарлагдмал тендерийг зарлаж “СМЕК Монголиа” компани шалгарав.
2011.08.31     “МакКинсей энд Компани”-аар ахлуулсан зөвлөх багийн хийж дууссан “Шинэ төмөр зам төсөл”-ийн ТЭЗҮ-г Засгийн Газрын ээлжит хуралдаанд танилцуулж, уг хуралдаанаар ”Шинэ төмөр замын төсөл”-ийг дэмжиж 40 дүгээр тэмдэглэл гаргав.
2011.11.12     “China CNR Corporation Limited” корпорацитай байгуулсан гэрээний дагуу 2 чингэлэг өргөгч, 185 хагас ачааны вагон орж ирэв.
2011.12.23      Монгол Улсын Засгийн газраас “Монголын Төмөр Зам” ТӨХК-ийг “Шилдэг 100 татвар төлөгч байгууллага”-аар өргөмжлөв.
2011.12.29    “Шинэ төмөр зам төсөл”-д шаардагдах санхүүжилтийг босгох чиг үүрэг бүхий санхүүгийн зөвлөх банкийг сонгон шалгаруулах олон улсын нээлттэй тендер зарлав.
2011 он           Улсын төсөвт 2,173,968.50 мянган төгрөгийн орлогыг төвлөрүүлэв.