“Эрүүл хүүхэд” аянаар Хэнтий аймгийн хэмжээнд 27 600 хүүхдийг үзлэгт хамруулахаар төлөвлөж, ажлын хэсгийг аймгийн Засаг даргын орлогчоор ахлуулан байгуулжээ. Орон нутагт үзлэг хийх сум, өрхийн эрүүл мэндийн төв, аймгийн нэгдсэн эмнэлэг, хувийн хэвшлийн эмнэлгийн 54 эмч нарыг үзлэг хийх арга зүй, хөтлөх маягт, мэдээлэх сургалтанд хамруулж өсөлт хөгжлийн хэмжилт хийх дадлага хийлгэн бэлтгэсэн байна. Эмчийн үзлэгээр хүүхдийн суурь өвчнийг илрүүлж эмчлэн, цаашид халдварт бус өвчлөлийг бууруулах зорилготой юм. Аян эхэлснээс хойш үзлэгийн 600 ширхэг маягт ирснийг есөн сум, аймгийн нэгдсэн эмнэлэг, өрхийн эмч нарт тараан үзлэг эхэлж 0-5, 5-12, 12-18 гэсэн насны ангиллаар хүүхдүүдийг үзлэгт хамруулж байна.

    “Эрүүл хүүхэд” аяны үзлэгийн эхний үе шат зургадугаар сарын 1-н хүртэл явагдаж, есдүгээр сараас хоёрдахь үе шат буюу эрүүлжүүлэх ажил эхлэх ажээ. Тус аяны санхүүжилтыг нийгмийн даатгалын сангаас гаргах бөгөөд эхний 40 хувийг олгож, үлдсэн хувийг гүйцэтгэлээр нь бодож олгох юм байна. Эхний санхүүжилтээр үзлэгийн хэрэглэгдэхүүн /бээлий, хэл дарагч гэх мэт/-ийг худалдан авч, мөн үзлэг хийх эмч нарын урамшуулалд олгох аж.

    Хэнтий аймгийн эрүүл мэндийн газар өнгөрсөн жил “Хүүхдийн шүд цоорох өвчин, хараа сонсголын эмгэгээс сэргийлье” сэдвээр хүүхдийн эрүүл мэндийн дэд хөтөлбөр боловсруулан хэрэгжүүлж 6 настай бүх хүүхдийг үзлэгт хамруулж эрүүлжүүлэх арга хэмжээ авсан нь “Эрүүл хүүхэд” аяны суурь болж байгааг аймгийн Эрүүл мэндийн газрын дарга Р.Байгалмаа онцолж байна. Уг дэд хөтөлбөрийн хүрээнд 6 настан 1900 хүүхдийг үзлэгт хамруулснаас 1234 хүүхэд өвчлөлтэй гарсны 107 хүүхдийг бүрэн эрүүлжүүлсэн байна.