Цагдаагийн экс дарга нарын шүүх хуралд гэрчээр дуудагдсан УИХ-ын гурван гишүүн хурлын танхимаас гарч сэтгүүлчдэд мэдээлэл хийлээ. Ц.Мөнх-Оргил хэлэхдээ "Хуулийн хүрээнд биднийг шүүх хуралд гэрчээр дуудсан учраас ирсэн. Өөр сонголт байхгүй. Гэхдээ өнөөдрийн хурал хойшлогдож, тодорхой шийдвэр гараагүй байгаа учраас биднийг хэвлэл мэдээллээр ярилцлага, тодруулга өгөхгүй байхыг анхааруулсан" гэлээ. Харин гурван телевизийг дотогш оруулж, ялгавартай хандсан тухай гишүүдээс тодруулахад ерөнхий сайд асан С.Баяр "Энэ явдлыг бид мэдэхгүй. Гэхдээ дараагийн удаа ингэж цензуртэй хандаж, ялгаварлахын оронд шүүх хурлаа нээлттэй явуулаач гэсэн хүсэлт тавьсан" гэсэн юм.

     Энэ үеэр шүүх хурлыг нээлттэй явуулах, цагдаа нарыг буруугүй хэмээх лоозон барьсан жагсагчид зогсоцгоож байлаа. Харин тэдний хажууханд УИХ-ын гишүүдийг авч явахаар таван хар өнгөтэй том жийп эгнэн зогсож байсан юм.