Цагдаагийн ерөнхий газрын даргын үүрэг гүйцэтгэгч асан, хошууч генерал Ч.Амарболд, Эргүүл хамгаалалтын газрын дарга асан, цагдаагийн хурандаа Ш.Батсүх, Нийслэлийн цагдаагийн газрын дарга асан, цагдаагийн хурандаа О.Зоригт, тус газрын Хэв журмын хэлтсийн дарга асан, цагдаагийн дэд хурандаа Г.Ганбаатар нарыг шүүх хурал өчигдөр цагдан хорих төвд боллоо.
    Цагдаагийн ерөнхий газрын даргын үүрэг гүйцэтгэгч асан, хошууч генерал Ч.Амарболд, Эргүүл хамгаалалтын газрын дарга асан, цагдаагийн хурандаа Ш.Батсүх, Нийслэлийн цагдаагийн газрын дарга асан, цагдаагийн хурандаа О.Зоригт, тус газрын Хэв журмын хэлтсийн дарга асан, цагдаагийн дэд хурандаа Г.Ганбаатар нарыг шүүх хурал өчигдөр цагдан хорих төвд боллоо.
    Манай сурвалжлах хэсгийг 9.00 цагт Цагдан хорих төвийн гадна очиход хорь гаруй машин, цагдаагийн ар гэрийн төлөөлөл бүхий 40-50 гаруй хүн, хэвлэлийнхэн аль хэдийнээ ирсэн байв. Мөн хохирогчийн өмгөөлөгч О.Баасанхүү, шүүгдэгчдийн өмгөөлөгч Н.Итгэлт, О.Алтангэрэл, Т.Мөнхгэрэл, Н.Энхтунгалаг нар иржээ.
    Харин 09.30 цагийн үед хар өнгийн гурван Ланд машин цуварсаар орсон нь гэрчээр дуудагдсан Ц.Мөнх-Оргил, Д.Лүндээжанцан, С.Баяр нар байлаа. Тэдний араас 09.50 цагт улсын яллагч С.Хишигжаргал, 10.10 цагт шүүгч Ч.Хосбаяр, Ш.Төгсгэрэл, М.Алдар нар цагаан өнгийн машинаар ирсэн юм. Ингээд шүүх бүрэлдэхүүн ирж дууссаны дараа хурал 10.20 цагт эхлэв. Хурал эхлээд удаагүй байтал дахин нэг хар Ланд хорихын хашаагаар нэвтэрсэн нь ерөнхийлөгч асан Н.Энхбаяр байсан юм.





    Хурал эхлэнгүүт хэвлэлийнхэн үнэмлэхээ үзүүлээд орох гэтэл зөвхөн Eagle, C1, МҮОНТ-ийг цохон хурлыг сурвалжлах эрх олгон бусад сонин, сайт, телевизийнхнийг гадна үлдээсэн юм. Бодит мэдээллийн ард түмэнд хүргэж байдаг хэвлэл мэдээллийхнийг ийнхүү цензурлэж байгаад сэтгүүлчид нэлээд бухимдацгаасан. Мөн цагдан хорихын гадна жагссан олон “Цагдаа нарыг байнга бурууртгаж, худал муугаар гаргадаг телевизүүдийг орууллаа. Ц.Элдэгборжийн халаасны газруудыг тасдаад оруулчихлаа. Биднийг биш юм гэхэд сэтгүүлчдийг оруул” хэмээн хоолой мэдэн хашгирч байв. Гэвч харамсалтай нь  “хэвлэлийхнээс цөөн хэдэн газрыг л оруул” гэж дээрээс даалгавар өгсөн. Нарийн учрыг бид мэдэхгүй гэхээс өөр хариултыг шүүхийн хуягууд өгөөгүй юм.



    Өчигдрийн хуралд өмнөхийн мөн адилаар цагдаа болон хохирогч нарын ар гэрийнхэн цагдан хорихын гадаа ирж, уриа лоозон барин жагссан байв. Ийнхүү 11.00 цагийн үед гадаа нь цугласан машины тоо 70 давсан бөгөөд жагсагчид, гадаа шахагдан үлдсэн сэтгүүлчид нийлээд үймээн гаргах нь холгүй байдалтай хүлээцгээнэ. Мөн БГД-ийн цагдаагийн хэлтсээс хорь гаруй алба хаагч хамгаалалтад гарсан байлаа. Ингээд шүүх хурал эхлээд удаагүй байтал 11.15 цагийн үед гэрчээр дуудагдан ирсэн Ерөнхийлөгч асан Н.Энхбаяр шүүх танхимаас гарч ирсэн юм.  Тэрбээр хэлэхдээ “Долдугаар сарын 1-ний хэргийг шүүх хуралд Д.Лүндээжанцан, С.Баяр, Мөнх-Оргил бид дөрвийг гэрчээр оролцуулах хүсэлтийг шүүгдээгчдийн өмгөөлөгчид тавьсан юм билээ. Үүнийг нь шүүх бүрэлдэхүүн үндэслэлтэй гэж үзээд биднийг шүүх хурал гэрчээр байлцуулахаар болсноо дуулгасан. Үүний дагуу би өнөөдрийн шүүх хуралд гэрчээр ирлээ. Миний хувьд энэ хуралд дуудсаных нь дагуу гэрчээр ирсэнээ тэмдэглүүлээд дуудсан цагт бэлэн байна гэсэн гарын үсэг зурчихаад гарч ирсэн. Мөн энэ шүүх хурлыг урьдын адил нээлттэй явуулах хэрэгтэй юм байна гэсэн байр сууриндаа илэрхийлсэн” гэв. Тэрээр хэвлэлийнхэнд тайлбар өгчихөөд явсан юм.

  
    Ийнхүү шүүх хурал явагдаж байгаа эсэх нь тодорхойгүй нэлээн удсаны эцэст 12.30 цагт сурвалжлах эрх авсан гурван телевизийн сэтгүүлч, зураглаачид гарч ирлээ. Тэднээс шүүх  хурлын талаар асуухад “Шүүх хуралдаан түр завсарласан. Учир нь шүүгдэгч нарын өмгөөлөгчид үйлчлүүлэгчдээсээ татгалзсан. Яагаад гэхээр өмгөөлөгчдийн зүгээс шүүх бүрэлдэхүүн Цэцийн шийдвэр гартал шүүх хурал болох боломжгүй. Мөн бид шүүх бүрэлдэхүүнд удаа дараалан хүсэлт тавьсан ч шүүх бүрэлдэхүүн огт хүлээж авдаггүй. Энэ нь өмгөөлөгчийн зүгээс шүүгдэгч нар өмгөөлөл үзүүлэх эрх зүйн орчинг бүрдүүлж өгөхгүй байна. Тиймээс өмгөөлөгчдийн зүгээс туслалцаа үзүүлэхээс татгалзлаа” гэсэн шаардлагыг шүүх бүрэлдэхүүнд тавьсан. Уг шаардлагыг шүүх бүрэлдэхүүн хэлэлцэхээр ортол биднийг шүүхийн танхимаас гаргачихлаа гэсээр гарч ирлээ.
    Харин 13.30 цагт шүүгдэгч Ч.Амарболдын өмгөөлөгч О.Алтангэрэл, Г.Ганбаатарын өмгөөлөгч Т.Мөнхдэлгэр нар нэлээд бухимдсан байдалтай гарч ирлээ. Учир нь тэднийг шүүх хуралд оролцохгүй, шүүгдэгчдээс татгалзлаа гэхэд шүүх бүрэлдэхүүний зүгээс хуралд заавал ор хэмээн шаардаж, 30 минут цагдаа нар саатуулсан гэв. Ингээд тэднийг гарч ирснээс хойш өмгөөлөгчгүй шүүх хуралдаан явагдаж байгаа гэх цуурхал тарав.

         Харин 14.05 цагт шүүх хурал хойшилсон нь тодорхой боллоо. Учир нь өмгөөлөгчгүйгээр шүүх хурлыг явуулах боломжгүй, мөн хурлыг орхин гарсан өмгөөлөгчдөд хариуцлага тооцно хэмээн мэдэгдэв. Шүүх хурал хойшилж, цугласан олон явсан ч гэрчүүд гарч ирэхгүй байлаа. Учир нь тэдний хамгаалагчид гарч ирэн хэвлэлийнхэн байна хэмээн мэдээлж байсан юм. Гэвч хэвлэлийнхэн тэднээс тайлбар авна хэмээн байсаар байв. Арга нь барагдсан уу үгүй юу 15.00 цагийн үед цагдаа нар хамгаалалтад гарч, гурван Ланд машин цуварсаар гарч ирлээ. Дотроос нь Ц.Мөнх-Оргил, Д.Лүндээжанцан, С.Баяр нар буун ирж, сэтгүүлчдэд мэдээлэл өгсөн юм. Ийнхүү тэд тайлбар өгч явснаар тэнд цугласан олон ч мөн тарав. Ингээд хурлын дараа тайлбар өгсөн өмгөөлөгч, гэрч нарын яриаг манай ярилцлага булангаас уншаарай.