Дэлхийн анхны роман хэмээгддэг Мүрасаки Шикибүгийн “Гэнжийн туульс” зохиолоос сэдэвлэсэн шинэ жүжиг УДЭТ-ын тайзнаа ирэх сард тавигдах гэж байна. Дэлхийн уран зохиолын сод туурвил болсон “Гэрэлт Гэнжийн дурлал”  жүжгийг урлагийн гавьяат зүтгэлтэн, найруулагч Ч.Найдандорж тайзны бүтээл болгон Монголын үзэгчдэд толилуулахаар ажиллаж буй. Уг жүжгийн зохиолыг Б.Галаарид бичжээ.

1000 гаруй жилийн өмнө амьдарч байсан язгууртан гаралтай япон бүсгүй Мүрасаки Шикибүг энэ зохиолыг бичсэнийх нь төлөө 1965 онд ЮНЕСКО дэлхийн суут хүмүүсийн жагсаалтад багтаасан бол 1997 онд АНУ-ын “Life” сэтгүүл энэ мянганд дэлхийг өөрчилсөн 100 үйл явдлын 83-т “Мүрасаки Шикибү “Гэнжийн туульс” хэмээх дэлхийн анхны роман бичсэний төлөө” хэмээн оруулсан байдаг аж. Одоогоор жүжигчид бэлтгэлээ хангаж байгаа бөгөөд ирэх сарын 10-наас тайзны бэлтгэлээ эхлүүлэх аж.