УИХ-ын гишүүн Х.Баттулга, Л.Гүндалай нар өнөөдөр УПЕГ-т Засгийн газрын дөрвөн сайдын авлига, хууль бус үйлдэлтэй холбоотой гэх материалыг өглөө. Өнгөрсөн долоо хоногт ерөнхий сайд С.Батболд, ЗГХЭГ-ийн дарга Ч.Хүрэлбаатар, ХЗДХ-ийн сайд Ц.Нямдорж, ЭБЭХ-ний сайд Д.Зоригт нарыг авлига авсан хэмээн АТГ-т шалгуулахаар болсон. УПЕГ-ын дарга нар ажил дээрээ байгаагүй тул тэд уг баримтаа УПЕГ-ын Тамгын газрын даргад өгсөн юм. Энэ үеэр Л.Гүндалай гишүүн ямар учраас дээрх хүмүүсийг хууль зөрчсөн гэж үзэж байгаагаа тайлбарлав.

УИХ-ын гишүүн Л.Гүндалай: Энержи ресурт дөрвөн хувийг өгөөд бид нарыг молгидсон

    2007 оны 2-р сарын зургааны өдөр Ц.Нямдорж УИХ-ын дарга байхад 27-р тогтоол гэж гарсан. 27-р тогтоолоор 15 стратегийн орд газрын нэрийг жагсаагаад хамгийн эхэнд нь Таван толгойн орд газрын ямар хэсгүүд орох вэ гэдгийг бичсэн байгаа. Таван толгойн нүүрсний орд газар гэдэгт “Энержи ресурс”, “Таван толгой”, “Дайцүки” компаниудын эзэмшиж байгаа тусгай зөвшөөрлийн хэмжээнд нөөц тогтоосон талбайг хамааруулна гэж байгаа. Энэ бол дээрх компаниудын  өичилсөн газар стратегийн орд газрын харьяалалд багтаж байгаа гэсэн үг. Гэтэл өнөөдөр Монгол улсын Засгийн газар ерөөсөө энэ УИХ-ын тогтоолыг хэрэгжүүлдэггүй. Таван толгой стратегийн орд газар л юм бол иргэд хувьцааг нь зээмших ёстой. Тэр дундаа Таван толгойн нөөцийг нь улсын төсвөөс тогтоосон байхад энэ орд газрын талаар Засгийн газар өнөөдөр болтол ямар ч шийдвэр гаргаагүй.

   Ингээд стратегийн орд газрыг  “Энержи ресурс” гэдэг олгигархуудын бүлэглэл  авчихсан. Тэр байтугай дамлаад зарж байгаа юм. Өнгөрсөн зун 700 сая долларын IPO хийж Хонконгийн хөрөнгийн бирж дээр 20 хувийг нь зарсан. Хонконгийн бирж дээр хувьцаа эзэмшдэг хужаа нар нь 20 хувийн эзэн нь болчихсон байгаа. Х.Баттулга гишүүний ярьж байгаагаар тэр мөнгийг 20 хэдэн хүн хувааж аваад байна. Түүнээс биш бид нарт өгч байгаа юм байхгүй.

  "Энержи ресруст" дөрвөн хувийг өгч бид нарыг молгидсон. Газар нутгийн 4 дөрвөн хувь гэж байгаа ч нөөцийнх нь хамгийн амархан авч болох, хамгийн их найдлагатай 20 хувийн нөөцийг авчихсан. Энэ нөхдүүдэд хариуцлага тооцохгүй өөгшүүлээд үүнийг хэлсэн, ярьсан хүнийг шал өөр юм, нууц гэрээ байгууллаа ч гэх шиг зүйл яриад байна. Тиймээс прокурор яаралтай шалгаж буруутанд хариуцлага тооцох ёстой.

МоАХ-ны тэргүүн Х.Баттулга: АТГ надаас байцаалт авсан болохоор шалгаж байгаа байх

- УПЕГ-т ямар баримтууд өгч байгаа вэ?
- АТГ-т өгсөн баримтынхаа хувийг прокурорт гардууж өглөө. Дарга нар нь байхгүй тул Тамгын газрын дарга нь авлаа. Прокурор сайн хянаж ажиллана гэж найдаж байна. Манайд ийм том хэргүүд замхрахдаа хурдан байдаг учраас хэвлэлийнхэн бас хянаж ажиллаарай. Ц.Нямдорж сайд УИХ-ын дарга байхдаа стратегийн орд газруудыг тогтоож өгсөн тогтоол баталсан. Тогтоол дотроо бүх юмыг тодорхой гаргачихсан байгаа. Энэ талаар Л.Гүндалай гишүүн тодорхой тайбарлалаа. Таван толгой ашиглалтанд орсон бол Монгол улс урагшаа хөдөлчихсөн байх байсан.

- Та энэ баримтуудыг яагаад өмнө нь дэлгээгүй юм бэ?
- Намайг телевизээр ярьсны дараа хүчтэй яригдаад эхэлсэн. Түүнээс биш урьд нь зөндөө л ярьдаг байсан. Төмөр зам чинь явахгүй байна. Монгол улс чинь өөдлөхгүй байна гэж. Өнгөрсөн гурван жилийг эргээд харахад бүгд л ярьж байсан асуудлууд.

- “Энержи ресурс"-д хувьцаа эзэмшдэг нь батлагдвал сайдын суудлаасаа огцоръё гэж яриад байгаа. Та юу гэж бодож байна?
- Баримтуудыг нь гаргаад л ярья.

- Таны өгсөн материулуудыг АТГ шалгаж эхэлсэн болов уу?
- Эхэлсэн байлгүй дээ. Ямартаа ч надаас тодотгол гэдэг юм уу байцаалт авсан. Тийм болохоор шалгаж байгаа гэж бодож байна. Хэвлэл мэдээлээр өргөн дэлгэр ярьж байгаа болохоор шалгах ёстой.