Засгийн газрын гол хөзрийг атгадаг дөрвөн сайдыг авлигал авсан хэмээн АТГ-д өгч чадсан МоАХ-ны тэргүүн Х.Баттулга АН-ын зоригтноор тодорч, намдаа түүхэн гавъяа байгуулж байна. АН хамтарсан Засгийн газарт цуг ажиллах хугацаандаа МАН-ынхан  ямар хүмүүс болохыг нь мэдсэн тул тэсвэр алдлаа, үүнээс цааш тэсэхгүй нь гэцгээж байсан. Тиймдээ ч хамт байхдаа хатгаж чадахгүй байсан үгээ хагацсан цагтаа хэлж буй нь энэ аж.
  МАН-ын сайд нарын булхайг хэн, хэрхэн дэлгэх вэ гэж удаан ярилцаж байж Х.Баттулгад энэ “эрхэм хүндэт” үүргийг өгсөн гэж ойрын эх сурвалж нь ярьж байна. Тиймдээ ч Х.Баттулгыг АН-ын гишүүд сүрхийн гэгч нь өмөөрч байгаа юм. Л.Гүндалай гишүүн хүртэл өчигдөр УЕПГ-т өгөх авлигалтай холбоотой гэх баримтыг нь дамжилцан очив.
  “Энержи ресурс”, “Дайцүки”, “Таван толгой” ХК нь стратегийн орд газарт багтана гэдгийг тэд аль эрт, 2007 оноос хойш тодорхой мэдэж байсан хэрнээ нэг ч үг дуугарч байсангүй. Харин одоо дээрх ордыг Монголын ард иргэд биш, цөөхөн хэдэн хүн эзэмшиж байна гэж шинэ мэдээ мэт ярьж байгаа. Сонгууль ойртож буйн илрэл ч энэ байх.
  УИХ-ын гишүүн Х.Баттулга өмнө нь ерөнхий сайд С.Батболд, ЗГХЭГ-ын дарга Ч.Хүрэлбаатар, ХЗДХ-ийн сайд Ц.Нямдорж, ЭБЭХ-ний сайд Д.Зоригт нарын булхайг илчилсэн баримтуудыг АТГ, УПЕГ, ерөнхийлөгчид өгч шалгуулна гэж ам гарч байсан. Түүнийхээ дагуу АТГ-д өглөө, УПЕГ-т ч өглөө. Хэрэв дээрх эрхэм сайд нарыг прокурор шалгаад эрүүгийн хэрэг үүсгэвэл тэд УИХ-ын сонгуульд нэр дэвших эрхгүй болох юм. Тэрбээр энэ баримтуудаа ирэх долооо хоногт ерөнхийлөгчийг гадаад томилолтоосоо ирэхэд нь өгч, дараагийн нүүдлээ хийхээр зэхэж байна. АТГ-ч, прокурорт ч тэр ерөнхийлөгч Ц.Элбэгдоржийн гарын хөдөлгөөнийг дагах болсон. Тиймээс МАН-ын сайд нарын “но”-г зүгээр өнгөрүүлэхгүй нь тодорхой болоод байна. Засгийн газар ч энэ хооронд зүгээр суухгүй "Х.Баттулгын солонгос, хятадуудтай хийсэн нууц гэрээ" гэх зэрэг сөрөг баримтаа бэлдэж байгаа сураг байна.