Засгийн газрын хэрэгжүүлэгч агентлаг Хүүхдийн төлөө газар, хүүхдийн төлөө ажилладаг төрийн болон төрийн бус олон улсын байгууллагуудын хамтын ажиллагааг өргөжүүлэх, байгууллагынхаа үйл ажиллагааг олон нийтэд сурталчилах, нөлөөллийн ажлыг эрчимжүүлэх зорилгоор “Хүүхдийн хөгжил оролцоо, хамтын ажиллагаа” өдөрлөгийг зохион байгуулах гэж байна.

Энэхүү арга хэмжээний үеэр хүүхдийн эрх хамгаалал, оролцооны талаарх олон нийтийн ойлголт, мэдлэгийг нэмэгдүүлэн, хүүхдэд ээлтэй хамгааллын орчин, хүүхдэд ээлтэй хөгжлийн орчин, хүүхдийн оролцоо, хүүхдийн мэдээллийн сан, хүүхдийн эрхийн конвенц, хүүхдийн ээлтэй уран бүтээл, хүүхдийн төлөө байгууллагуудын түншлэл, хамтын ажиллагаа зэрэг чиглэлээр сурталчилгаа зохион байгуулах аж. Мөн хүүхдийн уран бүтээлчид хүүхэд багачууддаа өөрсдийн дуу шүлэг заахын зэрэгцээ УДЭТ-т хүүхэд багачууддаа зориулсан уран бүтээлээрээ үнэ төлбөргүй бэлэг барих гэнэ. Өдөрлөгийн хүрээнд өнөөдөр 11.00-16.00 цагийн хооронд  Сүхбаатарын талбайд “Хүүхдийн хөгжил, оролцоо, хамтын ажиллагаа”  өдөрлөг, 14.30-16.30 цагт МХО-д “Хүүхдийн хөгжил, оролцоо, хамтын ажиллагаа бага хурал болно. 12.00-14.00 цагт “Хүүхдийн уран бүтээл” УДЭТ-т болно. Ирэх сарын нэгнээс, 5-ны хооронд “Инээж буй хүүхэд” XI-чуулган, “Хүүхэд насаа хайрлая” VI зөвлөгөөн ОУ-ын Найрамдал төвд болно. Мөн ирэх сарын 2-ны 14.00-17.00 цагт МХО-д "Инээж буй хүүхэд" зөвлөгөөн тус тус зохион байгуулагдах аж.