Өнөөдөр манай улсын төрийн тэргүүн Ц.Элбэгдоржийн төрсөн өдөр тохиож байна. Тэрбээр энэ баяраа ХБНГУ-д төрийн айлчлал хийж өнгөрүүлж байгаа юм. Хэдий тийм ч түүнд баярын мэнд хүргээд, түүний талаарх 10 баримтыг хүргэхээр бэлтгэлээ. 1. Ц.Элбэгдорж гэдэг энэ хүний түүх, намтар, амьдралын зам 49 жилийн өмнө буюу 1963 оны гуравдугаар сарын 30-ны өдрөөс эхэлж байжээ.
2. 1979 онд Ховд аймгийн зэрэг сумын найман жилийн дунд сургуульд сурагчаар төгссөн тэрбээр амьдралдаа нийт дөрвөн сургууль төгсч англи, орос хэл эзэмшиж, сэтгүүлчийн бакалавр, төрийн удирдлагын мастер зэрэгтэй болсон байна.
3. Түүний хийж байсан ажил нь уурхайн машинист, засварчин, ардын армийн түрүүч, Хувьсгалт залуучуудын эвлэлийн үүрийн дарга, сурвалжлагч, сонины эрхлэгч, Ардын их хурлын депутат, УИХ-ын гишүүн, ерөнхий сайд зэргээр үргэлжилнэ.
4. Хамгийн сүүлд 2009 оны тавдугаар сарын 24-нд болсон сонгуульд 51.24 хувийн санал авч ерөнхийлөгчөөр сонгогдон төр улсаа төлөөлөн гадны хэд хэдэн улсад албан айлчлал хийлээ. Өнөөдөр л гэхэд Герман улсын ерөнхийлөгчийн урилгаар ХБНГУ-д ажиллаж байгаа.
5. Армийн утга зохиолын нэгдлийн эрхлэгчээр ажиллаж байхдаа ардын армид байдаг “оны ялгаа” хэмээх харгис шинжийг уйгагүй шүүмжилж, цэргийн эрүүл мэнд, амь насны төлөө тэмцэж байсан гэнэ.
6. Төрийн тэргүүн маань улс төрийн ажлынхаа хажуугаар “Эрх Чөлөө төв”-ийг үүсгэн байгуулагч, хүндэт ерөнхийлөгч. “Либерти”, Америк сургууль, "Азийн санаачилга" институт, Уран зургийн академи, "Эрх чөлөө" сэтгүүл, "Philanthropy", "Элбэг тав", "Болор" сан"-гийн үүсгэн байгуулагч гэсэн тодотголтой нэгэн.
7. Мөн тэрбээр 1995 онд 32 настайдаа Монгол-Америкийн хамтарсан “Ийгл” телевизийг үүсгэн байгуулалцаж байсан гэнэ. Уг телевизийг христийн шашныг сурталчилдаг гэдгийг нь хүмүүс мэддэг боловч Монголын анхны бие даасан телевиз гэдгийг төдий л мэддэггүй болов уу.
8. Ерөнхийлөгч гэргий, тэргүүн хатагтай Х.Болормаатай 1982 онд Лвьов хотод хоёул суралцахаар очихдоо танилцаж байжээ. Тэдний анхны хүү 1986 онд төрсөн бөгөөд энэ гэр бүл одоо таван хүүхэдтэй болсон байна.
9. Монголын залуучуудын эвлэлийн өмнө 1989 оны арванхоёрдугаар сарын 10-ны жихүүн өглөө ардчиллын төлөөх анхны олон нийтийн цуглаан болжээ. Хүмүүс цуглахад Ц.Элбэгдорж “Монголд ардчилсан хөдөлгөөн байгуулагдлаа” гэж тунхагласан. Уг хөдөлгөөнөөс МоАХ байгуулагджээ.
10. Хоёр дахь удаагаа ерөнхий сайд болсон ч 2006 оны нэгдүгээр сарын 13-нд УИХ дахь МАХН-ын гишүүд болон АН-ын дөрвөн гишүүний саналаар Засгийн газрыг нь огцруулжээ. Тэрбээр УИХ-ын индэр дээрээс “Ардчиллыг дэмжигч бид олуулаа болоод эргэж ирнэ” хэмээн хоёр дахь удаагаа хэлж байв. Өмнө нь 1994 онд УИХ-д сонгогдсон АН-ын дөрвөн гишүүний нэг болчихоод татгалзахдаа энэ үгээ анх хэлжээ.
