Монголын үндэсний бөхийн холбооны тэргүүлэх зөвлөл өчигдөр хуралдаад бүх сумын заануудад залаа, энгэрийн тэмдэгтэй болгох шийдвэр гаргажээ. Өчигдөр баталсан уг шийдвэр удахгүй хэрэгжиж эхэлнэ. Урьд нь сумд түрүүлж, заан цолонд хүрсэн ч гэлээ залаа чимэггүй байсан билээ. Хоёр сарын өмнөөс залуу бөхчүүд болон сумын цолтой 512 тамирчны барилдааныг сар бүр зохион байгуулахаар болсон. Тэр ч үүднээсээ сумын цолтнууд харилцан туршлагажиж, хөгжих боломж бүрдэж байгаа. Харин өчигдрийн шийдвэрээр бөхчүүд энгэртээ тэмдэгтэй, малгайндаа залаатай, сумын заан гэдгийг нь албан ёсоор илтгэх чимэгтэй болох нь. Энэ мэтээр сумын цолтой, залуу бөхчүүдийг дэмжих ажлыг МҮБХ-ноос хэрэгжүүлсээр байна.