Өнөөдөр 14 цагаас МҮЭСТО-нд МАХН-аас санаачлан зохион байгуулж буй “Монгол улсын хүний нөөцийн алтан сан”-гийн нээлтийн ажиллагаа боллоо. Нээлтийн ажиллагаанд МАХН-ын дарга Н.Энхбаяр, МҮАН-ын дарга М.Энхсайхан, БНН-ын дарга Б.Жаргалсайхан, МАХН-ын ЕНБД Н.Удвал, МҮАН-ын дэд дарга Н.Батцэрэг тэргүүтэй 1200 зочид төлөөлөгчид оролцсон байна. Үйл ажиллагааг нээж МАХН-ын дарга Н.Энхбаяр үг хэллээ. Тэрээр хэлсэн үгэндээ “Монгол хүний үнэ цэнэ доройтож, хүний хөгжил төр засгийн анхаарлаас алсарч буй энэ үед Монгол хүнийхээ гавъяа зүтгэлийг өндөрт өргөж, алдаршуулах, мөнхжүүлэх, мэдлэг туршлага чадварыг нь дээшлүүлэх, Монголоо хүнээ алагчлалгүйгээр бүрэн дүүрэн ашиглахын тулд бид хүний нөөцийн алтан санг бүрдүүлж байна. Монгол хүн таны мэргэн оюун ухаан, холч ухаан, өндөр мэдлэг, Монгол улсад минь хэрэгтэй байна. Эх орон тань таныг дуудаж байна. Бүгдээрээ эвлэлдэн нэгдэж Монгол улсаа хөгжүүлцгээе” гэсэн юм.

Үүний дараа МАХН-ын шинээр гишүүн элсүүлэх, мөн хуучин МАХН-ын гишүүн байсан иргэдийнхээ гишүүнчлэлийг сэргээх ажиллагаа боллоо. Өнөөдөр МАХН-д Ч.Чимэдсүрэн, Г.Шийлэгдамба, С.Жанцан, Б.Батсайхан, Д.Чинзориг, Н.Дашцэрэн, Х.Оюунцэцэг, П.Ангараг, Б.Батжаргал, Г.Өсөхбаяр/МУ-ын даян аварга/, Ж.Доржханд, С.Баяраа зэрэг олон хүн элсэж намын батлахаа гардан авлаа.

МАХН-ын удирдлагууд үүний дараа МУ-ын хөдөлмөрийн баатарууд, Баатарууд, Академичид, Эрдэмтэд, Гавьяатуудадаа хүний нөөцийн алтан сангийн батламжийг гардууллаа.