УИХ-ын гишүүн Х.Баттулга тэргүүтэй АН-ын хэсэг нөхөд Засгийн газрын тэргүүнийг танхимын гурван сайдынх нь хамтаар АТГ-д өгчихөөд байгаа билээ. Асуудал намжаагүй байтал Ерөнхий сайд руу АН-хан дахин дайралт хийлээ. “Сонгуулийн тухай хууль”-ийг хэрэгжүүлэхгүй байна хэмээн засгийн газрыг бүрэн бүрэлдэхүүнээр нь огцруулах асуудлыг АН-хан УИХ-ын чуулганаар хэлэлцүүлэх гэж байна.

    Ирэх долоо хоногийн дөрөв дэхь УИХ-ын чуулган эхэлнэ. Чуулган эхлэхээр засгийн газрыг огцруулах асуудлыг өргөн барина гэдгээ ч мэдэгдсэн байгаа. Гацаанд ороод орон нутгийн сонгуулийн тухайд АН буулт хийж, аймаг дүүрэг болон сум, хороодын сонгуулийг салгаж хийе гэсэн санал гаргасан. Гэсэн ч МАН өөрсдийн байр суурь дээр хатуу зогсох хандлагатай байгаа. Анх 2008 онд хоёр сонгуулийг хамтад нь хийнэ гэж тохиролцоод хуулинд оруулчихсан хэрнээ тусад нь явуулж, будлиан тарих гэж байгаад АН-хан санаа зовж буйгаа мэдэгдсэн. Ялангуяа ухаалаг үнэмлэх, санал тоолох машиныг хариуцан ажиллаж байгаа МАН-ын хүмүүс ажлыг удаашруулж, Ж.Энхбаяр сайд байлдааны бэлэн байдалд бэлтгэнэ гэж ярьж байгаа нь МАН-ын хандлагыг харуулж байгаа гэж гишүүд үзжээ.

    АН-ынхан хоёр сонгуулийг хамтад нь хийе гэсэн саналтай байгаа бөгөөд энэ ажлыг засгийн газрын тэргүүн С.Батболд ахлаж ажиллах ёстой гэсэн ч ерөнхий сайд энэ саналыг хүлээж авалгүй татгалзсан юм. Учир нь хоёр сонгуулийг хамтад нь явуулах нь цаг хугацаа болон хүчин чадлын хувьд бололцоогүй гэж тэрээр үзэж байгаа аж.  Байр суурийн зөрүүтэй байгаа уг асуудал хэрхэн шийдэгдэх нь цаг хугацааны явцад тодорхой болох ч АН-хан хуулиа хэрэгжүүлэхгүй байгаа засгийн газрыг тэргүүнийх нь хамтаар огцруулахаар бэлдэж буй нь энэ аж. МАН-руу хийх дайралтыг УИХ-ын гишүүн Х.Баттулга эхлүүлж Л.Гүндалай дэмжиж одоо З.Энхболд үргэлжлүүлж байна.

    УИХ-гишүүн Х.Баттулга “Энержи ресурс” компанитай холбоотой хүмүүсийг АТГ-т өгсөн. Түүнд ерөнхий сайд С.Батболд, ЗГХЭГ-ын дарга Ч.Хүрэлбаатар, ЭБЭХ-ний сайд Д.Зоригт, ХЗДХ-ийн сайд Ц.Нямдорж нарын авлигатай холбоотой баримт байгаа аж. Х.Баттулга үнэхээр шудрага, эх оронч хүн юм бол засгийн газрын гишүүнээр ажиллаж байхдаа авлигатай холбоотой асуудлуудыг олон нийтэд дэлгэж, холбогдох хүмүүсийг нь АТГ-т өгөх ёстой байсан юм. Сайдаар ажиллахаа больсоны дараагаас ийм үйлдлүүдийг хийж буй нь ард түмэнд ямар нэгэн хардлага төрүүлээд буй. Х.Баттулга гишүүн нь хэргийг нуун дарагдуулсан гэх хууль бус үйлдэл хийж байна. Үүнийг нь ч нам нь дэмжиж байгаа нь  олны нүдэнд илт мэдэгдэж байгаа. Ер нь АН, сөрөг хүчин рүү гээ босч эхэллээ. Энэ нь сонгуулийн ажил аль хэдийн эхэлсэн байна гэдгийг илтгэж байгаа юм.