Хөвсгөл аймагт найман настай охиныг хүчирхийлсэн, онц хэрцгийгээр амь насыг нь хөнөөсөн хэрэгт яллагдагчаар татагдсан Н.Мөнх-Оргилыг гомдлыг өнөөдөр Улсын дээд шүүхийн Эрүүгийн танхимд хэлэлцэж, түүнд оноосон цаазын ялыг хэвээр баталлаа.
    Хөвсгөл аймагт найман настай охиныг хүчирхийлсэн, онц хэрцгийгээр амь насыг нь хөнөөсөн хэрэгт яллагдагчаар татагдсан Н.Мөнх-Оргилыг гомдлыг өнөөдөр Улсын дээд шүүхийн Эрүүгийн танхимд хэлэлцэж, түүнд оноосон цаазын ялыг хэвээр баталлаа.
    Түүнд 2010 онд Чингэлтэй дүүргийн шүүхэээс Эрүүгийн хуулийн 125.2 буюу бэлгийн дур хүслээ ёс бусаар хангасан, энэ хэргийг давтан үйлдсэн, 126.3 буюу насанд хүрээгүй хүүхдийг хүчирхийлсэн  91.2.6 91.2.10, 91.2.15-д зааснаар  буюу гэмт хэргээ нуун далдлах зорилгоор, санаатайгаар, хохирогчийг биеэ хамгаалах чадваргүйг мэдсээр байж амь насыг нь хөнөөсөн үндэслэлээр буруутган цаазын ял оноосон. Мөн найман настай охиныг хүчирхийлж амийг нь егүүтгэснээс гадна Баянгол дүүргийн нутаг дэвсгэрт бага насны гурван охин хүчирхийлсэн хэмээсэн юм. Гэвч тэрээр “Би хэрэг хийгээгүй” хэмээн шат шатны шүүхэд хандсанаар түүний хэрэг өнөөдөр хоёр дахь удаагаа Улсын дээд шүүхэд хэлэлцэгдэхээр ирээд байсан билээ.
    Одоо тэрээр ШШГЕГ-ын харьяа Цагдан хорих 461 дүгээр ангид хөл, гарандаа гав тушаатай хоригдож байгаа юм. Хэдийгээр Улсын дээд шүүхээс түүний ялыг хэвээр баталсан ч цаашид Улсын дээд шүүхийн зөвлөлийн хурал, цаашлаад Ерөнхийлөгчид хандах аж.

Хавтаст хэргийг сөхвөл.
   
Ажилд төвөг учруулах байх гээд “Аллага болсон өдөр надтай хамт байсан гэж хэлээрэй гэж ах дүү нартай захисан” гэв

    "Хэрэг гарсан өнгөрсөн оны тавдугаар сарын 3-нд би гэртээ унтаж байсан. Их үдийн алдад сэрэхэд "ЛХА" телевизийн сувгаар "Хүүхэд хөнөөгдсөн байна. Хэрэгтнийг харсан үзсэн хүн байвал яаралтай холбоо барина уу" гэсэн зар явж байсан. Охины зургийг харахад манай ахын хамар хашааны С.Рэнцэндорж ахын дунд охин байх шиг байсан.
Тэр өдөр би гэрээсээ огт гараагүй, орой 19:00 цагийн үед л гарч дэлгүүрээс гурил авсан юм. Тухайн үед цагдаа нар айл бүрийг нэгжиж байсан. Харин хэрэг гарснаас 18 хоногийн дараа цагдаа нар манай хаалгыг тогшсон.
Тэр үед би цагдаа нарт "Хэргийн өдөр ганцаараа байсан" гэж хэлбэл итгэхгүй, бас дахин, дахин дуудаж, ажилд төвөг учруулах байх гэж бодоод хаалгаа тайлж өгөөгүй. Энэ даруйдаа ах, дүү болох М, П нарт "Аллага болсон өдөр надтай хамт байсан гэж хэлээрэй" гэж захисан байсан. Гэтэл ах М маань цагдаа нарт " Н.Мөнх-Оргилтой хамт байгаагүй" гээд хэлчихсэн юм билээ.
    Мөн намайг нутгийн зарим иргэн цус болчихсон цэнхэр цүнхтэй зүйл барьчихсан зах руу явж байсан гэж хэлсэн байна. Би тэр өдөр гэрээсээ огт гараагүй. Тэгээд ч хэрэгтний цүнх "Adidas" гэсэн бичигтэй юм билээ. Харин минийх "Nike" гэсэн бичигтэй. Манай дүү нар надад цэнхэр өнгийн цүнх байдаг болохоор бичгийг нь харалгүй "Цүнх нь мөн байна" гээд хэлчихсэн юм шиг байна лээ. Манай гэрээс иштэй чихрийн иш гарч ирсэн гэдэг. Тэрийг мэдэхгүй байна. Залуу хүн учраас эротик сэтгүүл уншдаг нь үнэн" гэжээ.
    Нутгийн иргэд нь  мөн түүнийг "Цус болсон цэнхэр цүнх үүрээд явж байсан, М охиныг гэрийнх нь ойролцоо хөтөлж яваа харагдсан. Цагдаа нараас зугтаад байсан" гэх зэргээр мэдүүлсэн байна.
    Мөн Хөвсгөл аймагт бага насны охин хүчирхийлэн хөнөөсөн хэргээс гадна Баянгол дүүрэгт бага насны гурван хүчирхийлсэн хэрэгт холбогдоод байгаа юм.

Харин нийслэлд гурван охиныг хүчирхийлсэн хэрэгтээ дараах тайлбарыг өгч байжээ.

Хүчирхийлэл үйлдэгдсэн өдрүүдэд хотод байсан минь үнэн. Гэхдээ тухайн өдрүүдэд юу хийснээ санахгүй байна.

"Хотод эмчилгээ хийлгэхээр өнгөрсөн оны гуравдугаар сарын сүүлээр Мөрөн хотоос ирээд дөрөвдүгээр сарын 20-ны үеэр буцсан. Хүчирхийлэл үйлдэгдсэн гэх өдрүүдэд хотод байсан нь үнэн. Тэр өдрүүдэд юу хийж байснаа нарийн санахгүй байна. Охидыг хүчирхийлсэн болгохын тулд намайг туранхай, жижигхэн биетэй банди нартай жишүүлж зогсооход хохирогчид намайг гэж заасан. Тэд буруу таньсан байх" гэх мэт мэдүүлгүүдийг өгч байжээ.

Харин хохирогч охид дараах мэдүүлгийг өгсөн байна.

Намайг хүчирхийлсэн хүн Н.Мөнх-Оргил мөн

Хохирогч С /10 настай/: Өнгөрсөн оны дөрөвдүгээр сарын 8-нд хажуугийн байранд амьдардаг найз Г-ийнд очихоор гэрээсээ гарсан. Энэ үед цаг 11.30 болж байсан. Намайг цахилгаан шатанд ороход нэг ах дагаад орсон. Тэр ах надаас "Чи хэддүгээр анги вэ" гэж асуухаар нь "Дөрөвдүгээр анги" гэсэн. Намайг зургадугаар давхарт гарахад тэр хүн дахиад л хамт цахилгаан шатнаас буусан. Тэгээд ийш, тийшээ харж байснаа миний хамрыг чимхэж, хоолой багалзуурдан хогийн бункерийн дэргэд аваачин хана налуулахад нь ухаан алдаад уначихсан. Нэг сэрэхэд би хөдөлж ч чадахгүй байсан. Намайг хүчирхийлсэн хүн бол Н.Мөнх-Оргил мөн. Энэ ах тухайн үедээ хар өнгийн урт хүрэм, бараан өнгийн саравчтай малгайтай байсан".

“Хивс өргөлцөөд өг” гуйсан

Хохирогч Н /есөн настай/: Өнгөрсөн оны дөрөвдүгээр сарын 21-нд хичээлээ тараад ангийнхаа М-ийнд очихоор явж байтал байрны гадаа нэг ах "Чи хэддүгээр анги вэ. Манай гэрт ороод хивс өргөлцөөд өгөөч" гэж гуйсан. Тэр хүнд туслахаар тухайн байрны зургадугаар давхарт гарахад "Манай гэрт хүн байхгүй юм шиг байна" гээд намайг хүлээлгээд зогсоосон. Тэгснээ "Миний дүү цүнхээ урдаа барьчих, мөр чинь өвдөнө" гэхээр нь би цүнхээ урдаа барьж үүрсэн. Гэтэл гэнэтхэн араас багалзуурдсан. Би айгаад орилсон чинь тэр хүн айгаад зугтчихсан. Би тус давхрын нэг айлд орж, гэртээ хүргүүлсэн".

Нэг ах намайг хүчирхийлсэн

Хохирогч Б /найман настай/: Өнгөрсөн оны дөрөвдүгээр сарын 22-нд 13.00 цагийн үед нэг ах намайг хүчирхийлсэн хэмээн хэргийнхээ талаар дэлгэрэнгүй ярьжээ.

Ингээд түүний өнгөрсөн арваннэгдүгээр сарын 8-нд болсон шүүх хурлын үеэр өгч байсан яриаг хүргье.

 
-Шүүхийн шийдвэр ямар гарна гэж бодож байна?

-Шүүхийн шийдвэрийг шударга гарна гэдэгт итгэлтэй байна. Учир нь би хэрэг хийгээгүй. Үнэн бүгдийг ялна. Тэр үед би та бүхэнтэй баяртайгаар уулзах болно. Монгол Улсын шүүх дэлхийн шилдэг шударга байгаасай гэж би хүсч байна.

-Дээд шүүхээс хэргийг чинь мөрдөн байцаалтад буцаасан. Энэ талаар юу хэлэх вэ?

-Би хэрэг хийгээгүй болохоор шүүхийн шийдвэр сонсоод гайхаагүй.

-Цаазын ял сонсоод буцсан шүү дээ?

-Хэргийн учир олдоно гэдэгт би итгэлтэй байсан.

-Гэхдээ ДНК-ийн шинжилгээгээр таныг хэрэг хийсэн гэдгийг баталсан байгаа?

-Би хийгээгүй хэрэгтээ яллагдаад сууж байгаа хүн. Энэ талаар бүх юм тодорхой болсны дараа хэлнэ.

-Яагаад өмгөөлөгчөө солих болсон юм бэ?

-Дээд шүүхийн шийдвэр гарсны дараа би өмгөөлөгчөө сольсон. Нэгэнт хэрэг хийгээгүй болохоор ийм алхам хийсэн. Одоо шүүхийн шийдвэрт итгэлтэй байна. Миний эрүүл мэнд, сэтгэл санаа сайн байгаа болохоор даваад гараад ирнэ.

-Сэтгүүлчид байнга ирээд байхаар танд хэцүү байдаг уу?

-Харин ч сайн гэж боддог ш дээ. Хэрэг хийгээгүй хүнийг яаж гүтгэж байгааг гаргах хэрэгтэй байх. Надад өнөөдөр бүх үнэнийг ярих эрх чөлөө алга.

-Хэрэгт холболгдсоноос чинь хойш та өөрийн байр сууриа илэрхийлээгүй?

-Хэвлэл мэдээллийнхэнд ярилцлага өгье гэж боддог. Гэхдээ одоо бүх юм хаалттай байна. Шүүхийн шийд эцэслэн гарсны дараа би бүгдийг ярих болно.

-Таны биеийн байдал ямар байна вэ. Өмгөөлөгчдөө цагдан хорих төвд хүнд байдаг гэж хэлсэн удаатай?

-Бие сайн байгаа. Одоо хэцүү гээд байх зүйл алга.