АН-ын дарга Н.Алтанхуяг, МАН-ын дарга С.Батболд нар Таван толгойн хувьцаа болон иргэдэд тараах сая төгрөгийн талаар дэлгэрэнгүй мэдээлэл хийнэ гэж зарласан ч ерөнхий сайд С.Батболд ирээгүй юм. Тиймээс Н.Алтанхуяг ганцаараа МАН-ыг ажлаа хийхгүй байна хэмээн буруутган ярьсаар хэвлэлийн бага хурлыг дуусгасан. Тэрбээр С.Батболд сайдад хамтарсан мэдэгдэл хийх тухай албан бичиг явуулж, утсаар ярьж тохиролцсон ч ирсэнгүй гэж буруутгаж байв. Харин ерөнхий сайдын хэвлэлийн төлөөлөгчид ийм албан бичиг ирээгүй, худал мэдээлэл тарааж байна гэсэн мэдээлэл өгсөн. Зарим нь ерөнхий сайд С.Батболдыг ажлаа хийгээгүй, сая төгрөгийг хэрхэн, яаж тараах тухай хэлэх үггүй болсон тул ирсэнгүй гэж дүгнэж байна. Нөгөө талаас АН-ын даргыг үүнийг нь мэдээд ганцаараа АН-ыг хийх зүйлээ хийсэн, МАН ажлаа хийхгүй байна гэсэн сэтгэгдлийг олон нийтэд төрүүлэх гэсэн оролдлого хийсэн гэж үзэж байна. АН-ын зүгээс дарга нь үнэн хэлсэн гэдгийг баталж албан бичиг явуулснаа хэвлэлүүдээр тарааж эхлэв. 
Ч.Хүрэлбаатар: Ганцаараа энэ мэдэгдлийг хийе гэж ийм ажил зохион байгуулсан гэж бодож байна
- Ерөнхий сайдыг хамтарсан мэдэгдэл хийе гэсэн албан бичиг хүргүүлсэн ч ирсэнгүй гэж АН-ын дарга Н.Алтанхуяг мэдэгдлээ. Харин ЗГХЭГ-т ийм бичиг ирээгүй гэж тайлбарлаж байна. Чухам аль нь үнэн юм бол оо?
- Ганцаараа энэ мэдэгдлийг хийе гэж ийм ажил зохион байгуулсан болов уу гэж бодож байна. Урьд нь тэргүүн шадар сайд, шадар сайдтай байхад ерөнхий сайд түр байхгүй үед хурал удирдаад байж болдог байсан. Тэгвэл өнөөдөр тэргүүн шадар сайд байхгүй байгаа. Шадар сайд томилолттой байгаа. Засгийн газрын хуралдаанаар зайлшгүй ерөнхий сайд байх шаардлага байсан. Өнөөдөр бүтээн байгуулалт, тухайлбал, Замын-Үүдийн ерөнхий төлөвлөгөө, иргэний нийгтийн талаар төрөөс авах баримт бичиг зэрэг чухал асуудлыг хэлэлцсэн. Одоо нэг талаас нь мэдээлэл яваад байна. Муухай ч юм уу, буруу ч юм уу харагдуулах гээд байгаа зүйл болчих вий гэж энэ тайлбарыг хийж байна.
